Sirdaryo, Namangan va Andijon viloyatlarida qariyb 88 kg giyohvandlik moddalarni olayotgan shaxslar ushlandi, deb xabar berdi IIV matbuot xizmati.
Maʼlum qilinishicha, Toshkent va Sirdaryo viloyatlarida o‘tkazilgan tezkor tadbirlarda 1971-yilda tug‘ilgan fuqaro L. hamda 1994-yilda tug‘ilgan shaxslar Sirdaryo tumanidan o‘tgan yo‘l chetida, dala maydonidagi yashirilgan joydan 3 dona qora sumkaga joylangan, giyohvandlik vositalarini olayotgan vaqtida ushlandi.
Tadbir davomida jami og‘irligi 77 kg 410 gramm giyohvandlik moddalari olindi.
Namangan viloyatida o‘tkazilgan tezkor tadbirda 1989-yilda tug‘ilgan fuqaro R., X. va 1990-yilda tug‘ilgan A. Uchqo‘rg‘on tumanida yashirilgan joydan 5 kg giyohvandlik vositalarini olayotganda ushlandi.
1998-yilda tug‘ilgan fuqaro T. va 1984-yilda tug‘ilgan S. Andijon viloyatining Paxtaobod tumanidagi dala maydonida yashirish yo‘li bilan ko‘mib qo‘yilgan 5 kg sintetik giyohvandlik vositalarini olayotganda ushlandi.
Tezkor tadbir davom ettirilib, gumonlanuvchilarning yashash manzili ham xolislar bilan ko‘zdan kechirildi. Natijada umumiy og‘irligi 364 gramm giyohvandlik vositalari, grammlarga ajratilib, sotish uchun ishlatiladigan paketlar, noutbuklar daliliy ashyo sifatida olindi.
Barcha holatlar yuzasidan Jinoyat kodeksining 273-moddasi bilan jinoyat ishi qo‘zg‘atilgan. Gumonlanuvchilarga nisbatan qamoqqa olish tarzidagi ehtiyot chorasi qo‘llanilgan.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)