Jizzax viloyatining Paxtakor tumani, “Paxtakor” mahallasida yashovchi shaxsning turar joyi ichki ishlar xodimlari tomonidan ko‘zdan kechirildi. Bu haqda viloyat IIB matbuot xizmati xabar berdi.
Mazkur jarayonda fuqaro uyida ikki tup kannabis yetishtirayotgani aniqlandi. Shuningdek, uning uyidan giyohvand moddasi isteʼmol qilishga moslashtirilgan ikki dona suv idishi, sovuq qurollar tarkibiga kiruvchi ikki dona pichoq, 19 dona pirotexnika vositasi hamda giyohvand moddalarni o‘lchash uchun mos tarozi topildi. Ushbu tarozidan fuqaro giyohvandlik vositalarining og‘irligini o‘lchashda foydalangani taxmin qilinmoqda.
Fuqaro tergovga qadar surishtiruvni o‘tkazayotgan ichki ishlar xodimiga 500 dollar pora taklif qiladi. Bu pul evaziga xodim jinoyat ishiga oid hujjatlarni tergov organlariga o‘tkazmasligi hamda surishtiruvni to‘xtatishi kerak bo‘lgan.
O‘tkazilgan tezkor tadbirda fuqaro xodimga 200 dollar va 3,9 mln so‘m bergan vaqtida ushlandi.
Giyohvand moddalar savdosi
Mart oyi o‘rtalarida DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangandi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, shuningdek, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Aprel oyi oxirida Toshkent viloyatida narkokuryerlik bilan shug‘ullangan kollej talabasi ushlangandi.
Oktyabr oyining 10 kuni davomida giyohvandlik vositalarini yashirish yo‘li bilan (“zakladka”) tarqatgan va shunday noqonuniy faoliyat bilan shug‘ullangan 32 nafar shaxs ushlangan.
Izoh (0)