AQSH prezidenti Donald Tramp G‘azoni “tozalash” uchun falastinliklarni arab davlatlariga ko‘chirishni taklif qilgandi. Eron bunag javoban isroilliklarni Grenlandiyaga ko‘chirishni ilgari surddi. Bu haqda Eron tashqi ishlar vaziri Abbos Arag‘chi Sky News nashriga bergan intervyusida ma’lum qildi.
“Mening taklifim boshqacha. Falastinliklar o‘rniga isroilliklarni haydashga harakat qiling, ularni Grenlandiyaga olib boring, shunda bir o‘q bilan ikkita quyonni o‘ldirasiz”, dedi Arag‘chi.
Vazir Isroilning AQSH ko‘magida Eronning yadroviy dasturiga ehtimoliy hujum qilishiga quyidagicha munosabat bildirdi:
“Biz yadro obyektlarimizga qilingan har qanday hujumga darhol va qat’iy javob berilishiga aniq ishora qildik. Lekin ular bunday ahmoqona ishga qo‘l uradi, deb o‘ylamayman. Bu haqiqatan ham telbalik. Butun mintaqani juda katta falokatga olib keladi”, dedi vazir.
Amaldorning ta’kidlashicha, Tehron Trampning takliflarini tinglashga tayyor. Biroq, birinchi bitim bilan sodir bo‘lgan voqealarni hisobga olgan holda, Eronni AQSH bilan boshqa bitim bo‘yicha muzokaralarga kirishish zarurligiga ishontirish uchun ancha ko‘p narsa talab etiladi. Gap yadroviy kelishuv haqida bormoqda.
2015-yilda Buyuk Britaniya, Germaniya, Xitoy, Rossiya, AQSH, Fransiya va Eron yadroviy kelishuvni – Eron yadroviy dasturiga cheklovlar evaziga sanksiyalarni bekor qilishni nazarda tutuvchi Qo‘shma keng qamrovli harakatlar rejasini imzoladi. AQSH Tramp prezidentligi davrida 2018-yilning may oyida ushbu kelishuvdan chiqqan va Tehronga qarshi sanksiyalarni tiklagan. Bunga javoban Eron kelishuv bo‘yicha o‘z majburiyatlarini bosqichma-bosqich qisqartirish, yadroviy tadqiqotlar, sentrifugalar va uranni boyitish darajasidagi cheklovlardan voz kechishini e’lon qilgan.
Trampning falastinliklarni arab davlatlariga ko‘chirish taklifi
AQSH prezidenti Donald Tramp Iordaniya, Misr va boshqa arab davlatlarini G‘azo sektoridan qabul qilayotgan falastinlik qochqinlar sonini ko‘paytirishga chaqirdi. U buni Iordaniya qiroli Abdulla II bilan telefon orqali muloqotda muhokama qilganini aytdi. Prezident bu vaziyatda falastinlik qochqinlarga G‘azo tashqarisida uy-joy qurish uchun ba’zi arab davlatlari bilan hamkorlikni afzal ko‘rishini bildirdi.
HAMAS buning o‘rniga, falastinliklarning barcha huquqlarini, shu jumladan, poytaxti Quddus bo‘lgan mustaqil davlat qurish huquqini amalga oshirishlari uchun ishlashni talab etdi.
Tramp Isroilga bombalar yuborishni tikladi
U Baydenning Isroilga 2000 funtlik bombalarni yuborish bo‘yicha joriy etgan taqiqini bekor qildi. Bu Isroil va HAMAS o‘rtasidagi urush paytida tinch aholi qurbonlari sonini kamaytirishga qaratilgan bosimni yo‘qqa chiqaradi. AQSH prezidenti taqiqni bekor qilish qarorini quyidagicha izohlamoqda:
Ular bombalarni uzoq vaqtdan beri kutishayotgan edi. Chunki ularni sotib olishgan, deb javob berdi siyosatchi.
Izoh (0)