AQSH 36 ta davlat fuqarolari uchun mamlakatga kirish cheklovlarini joriy etmoqchi. Bu haqda davlat departamenti hujjatlari bilan tanishgan The Washington Post xabar bermoqda.
Ro‘yxatga Afrikaning 25 davlati, jumladan, Misr va Jibuti kabi AQSH hamkorlari, shuningdek, Karib dengizi, Tinch okeani mintaqasidagi davlatlar kiritilgan. Markaziy Osiyo mintaqasidan Qirg‘iziston ushbu ro‘yxatdan joy olgan.
Shuningdek, Angola, Antigua va Barbuda, Benin, Butan, Burkina Faso, Kabo Verde, Kamboja, Kamerun, Kongo, Dominika, Efiopiya, Gabon, Gambiya, Gana, Kot d’Ivuar, Liberiya, Malavi, Mavritaniya, Niger, Nigeriya, Sent Kits va Nevis, Sent Lyusiya, San Tome va Prinsipi, Senegal, Janubiy Sudan, Suriya, Tanzaniya, Tonga, Tuvalu, Uganda, Vanuatu, Zambiya va Zimbabve kabi davlatlar ro‘yxatga kiritilgani aytilmoqda.
“Bu tashabbus Tramp maʼmuriyatining immigratsiya siyosatini kuchaytirishida yangi bosqich bo‘ladi”, deyiladi xabarda.
Davlat kotibi Marko Rubio tomonidan imzolangan va amerikalik diplomatlarga yuborilgan hujjatga ko‘ra, yuqorida tilga olingan davlatlar hukumatlariga davlat departamentining yangi talablarini bajarish uchun 60 kun muhlat berilgan.
Hujjatda aytilishicha, bu davlatlar bir qator mezonlarga javob bermaydi. Ayrimlarida ishonchli hujjatlarni beruvchi vakolatli organlar yo‘q yoki keng firibgarlik holatlari kuzatilmoqda. Shuningdek, ushbu mamlakatlarning ko‘plab fuqarolari AQSHda bo‘lish muddatiga rioya qilmaydi.
Nashrning yozishicha, davlat departamenti vakili rasmiy hujjatlarga izoh berishdan bosh tortgan. Oq uy ham bunga izoh bermagan.
Donald Tramp 9-iyundan 12 davlat fuqarolariga AQSHga kirishni butunlay taqiqlagandi. Ular qatorida Afg‘oniston, Chad, Kongo, Ekvatorial Gvineya, Gaiti, Somali va Eron bor edi. AQSH prezidenti, shuningdek 7 ta davlat (Burundi, Kuba, Laos, Syerra Leone, Togo, Turkmaniston, Venesuela) fuqarolari kirishini qisman cheklovchi farmonni imzoladi.
Tramp 2023-yil oktyabrida G‘azo sektori, Liviya, Somali, Suriya, Yaman va xavfsizlikka tahdid soladigan boshqa davlatlar fuqarolariga AQSHga kirishni taqiqlashini aytgan edi.
Izoh (0)