Fransiya prezidenti Emmanuel Makron AQSH prezidenti Grenlandiyani egallab olish bilan qilgan tahdidini tanqid qildi. Bu haqda The Guardian xabar berdi.
AQSH prezidenti Donald Tramp Grenlandiya haqida fikrlarini bayon etganidan beri Makron Arktika hududiga tashrif buyurgan birinchi xorijiy davlat rahbari bo‘ldi.
“Men ittifoqchilar bunday qilmaydi, deb o‘ylayman. Hududiy yaxlitlikni hurmat qilish lozim”, dedi Makron. Bu Grenlandiya bilan “Fransiya va Yevropa Ittifoqi birdamligini” yetkazishga qaratilgan o‘ta ramziy tashrif bo‘lgani aytilmoqda.
Tramp bir necha bor AQSH Atlantika va Arktika o‘rtasidagi yo‘llar chorrahasida joylashgan Grenlandiyaga AQSH milliy xavfsizligi nuqtayi nazaridan muhtojligini aytgandi.
So‘rovlar shuni ko‘rsatadiki, Grenlandiyaning 57 ming aholisining aksariyati Daniyadan mustaqil bo‘lishni istaydi, ammo AQSHning bir qismi bo‘lishni xohlamaydi. Daniya hukumati “Grenlandiya sotilmasligini va faqat grenlandiyaliklar o‘z kelajagini belgilashi mumkin”ligini bilrdirgan.
Fransiya prezidenti, shuningdek, global isish oqibatlarini ko‘rish va Grenlandiyaning suverenitetini hurmat qilgan holda rivojlanishga yordam berish uchun hududga tashrif buyurgandi. Gidroelektr stansiyasiga rejalashtirilgan tashrif esa bekor qilingan. Makronning bu hududga tashrifi Grenlandiyadagi “ovchilik”ning oldini olishga qaratilgani aytilgan.
Mart oyida AQSH vitse-prezidenti Jey Di Vens Pituffikdagi AQSH harbiy bazasiga tashrif buyurib, Daniyani “Grenlandiya xalqiga yaxshi ish qilmagani” uchun tanqid qilgan va Kopengagen hudud xavfsizligini e’tiborsiz qoldirganini da’vo qilgandi.
Rossiyadan AQSHga uchiriladigan raketalar uchun eng qisqa yo‘l bo‘lgan Pituffik Vashingtonning raketaga qarshi mudofaa tizimi uchun juda muhim hisoblanadi. Grenlandiyaning strategik ahamiyati esa noyob minerallarga bo‘lgan intilish va muzning erishi yangi yuk tashish yo‘llarini ochishi fonida oshib ketgan.
AQSH mudofaa vaziri Pit Xegset o‘tgan haftada Pentagon zarurat tug‘ilganda Grenlandiyani kuch bilan bosib olish rejalarini ishlab chiqqanini tan olgandek bo‘lgan. Biroq Kongressdagi eshituvda bu mavzu bo‘yicha takroriy savollarga javob berishdan bosh tortilgan.
Izoh (0)