Peru poytaxti Limada sodir bo‘lgan 5,6 magnitudali zilzila oqibatida kamida bir kishi halok bo‘ldi, yana besh kishi jarohat oldi. Bu haqda Al Jazeera xabar berdi.
Amerika Qo‘shma Shtatlari Geologiya xizmati 15-iyun kuni zilzila mahalliy vaqt bilan 11:35 da (Grinvich bo‘yicha 16:35) Tinch okeanida sodir bo‘lganini, uning epimarkazi poytaxt Limadan g‘arbda joylashgan port shahri Kallaodan 23 km janubi-g‘arbda joylashganini ma’lum qilgan.
Peru prezidentligi ma’lumotiga ko‘ra, zilzila kuchi aslida yuqori bo‘lib 6,1 ballni qayd etgan. Zilzila sunami xavfini keltirib chiqarmagan. Mamlakat prezidenti Dina Boluarte zilziladan keyin qirg‘oqni kuzatish uchun Kallaoga ketayotgani aytilgan.
Politsiya polkovnigi Ramiro Klauko 36 yoshli erkak Lima shimolida avtomobili oldida yo‘lovchi kutib turganida vafot etganini ma’lum qilgan. Favqulodda vaziyatlar markaziga ko‘ra, shifoxonada 5 kishi davolanmoqda, yo‘llar va ta’lim markazlariga zarar yetkazilgani haqida ham xabar berilgan.
Peru geofizika instituti ijrochi prezidenti Ernando Taveraga ko‘ra, Limadagi barcha tumanlarda zilzila kuchi sezilgan. Mahalliy radiostansiyalar ham zilzila Limada bo‘lib o‘tishi kerak bo‘lgan yirik futbol uchrashuvining bekor qilinishiga sabab bo‘lganini ma’lum qilgan.
Janubiy Amerika davlati Tinch okeani bo‘ylab zilzilalar va faol vulqonlar tez-tez sodir bo‘ladigan “olov halqasi” deb nomlanuvchi hududda joylashgan bo‘lib, Peruda har yili o‘rtacha kamida 100 ta zilzila sodir bo‘ladi.
So‘nggi yirik zilzila 2021-yilda Amazonka mintaqasida sodir bo‘lgandi. Unda zilzila magnitudasi 7,5 bo‘lib, 12 kishi jarohatlangan va 70 dan ortiq uy vayron bo‘lgandi. Mamlakatda sodir bo‘lgan eng halokatli zilzila 1970-yilda Peruning Ankas viloyatida sodir bo‘lgan va 70 mingga yaqin odamning o‘limiga olib kelgandi.
Izoh (0)