Aktyorlik karyerasida rol tanlash g‘oyat muhim ahamiyatga ega. Mashhur serial yoki filmda ishtirok etish bir kechada nomi uncha tanilmagan aktyorni haqiqiy yulduzga aylantirishi, muvaffaqiyatsiz loyihadagi rol esa karyera rivojiga jiddiy zarar yetkazishi mumkin.
Kon Yu va “Quyosh avlodlari”
“Quyosh avlodlari” zamonaviy Koreyaning eng mashhur dramalaridan biri sanaladi. BMT tinchlikparvari kapitan Yu Shi Jin va harbiy shifokor Kan Mo Yonning sevgi qissasi butun dunyo tomoshabinlarini o‘ziga rom etdi. Hozirda jasur harbiy rolini Son Jun Gidan boshqa hech kim ijro eta olmaydigandek tuyulsa-da, u bosh rolga taklif qilingan yagona aktyor emasdi. “Shahzodaning birinchi qahvaxonasi” dramasining yulduzi Kon Yu ham Yu Shi Jin kapitan rolini ijro etish uchun jiddiy nomzod sifatida ko‘rib chiqilgandi. Biroq Kon Yu juda band ish jadvali va sochini kaltalatishi sababli taklifni rad etadi. Natijada ijodkorlar Son Jun Gini tanladi, Kon Yu esa ko‘p o‘tmay boshqa mashhur “Iblis” dramasidagi ajoyib ijrosi bilan tomoshabinlarni lol qoldirdi.
Chan Xyok va “Sirli bog‘”
Koreys fantastik seriali “Sirli bog‘” 2010-yilning eng mashhur asariga aylandi. Yomg‘ir paytida tanalari almashib qolgan tadbirkor Kim Ju Von va kambag‘al, biroq mag‘rur kaskadyor ayol Gil Raim o‘rtasidagi muhabbat qissasi tomoshabinlar e’tiborini tortdi. Dastlab serial ijodkorlari “Buyuk umid” va “Rahmat” seriallarida rol ijro etgan koreyalik aktyor Jang Hyokni Kim Ju Von rolida ko‘rishni istashgan. Biroq aktyorning “Sirli bog‘”da qatnashishi uning agentligi taklifni rad etgani sababli amalga oshmadi va 2010-yilda u boshqa mashhur serial “Qul ovchilari”da bosh rolni ijro etdi.
Ekranda Kim Ju Von obrazini aktrisa Ha Ji Von bilan hamkorlikda o‘ynagan aktyor Hyon Bin ajoyib tarzda gavdalantirdi. Serial efirga chiqqandan so‘ng aktyorning ismi va yuzi mashhur gazetalar sahifalarida, televideniye va internetda tez-tez uchray boshladi — bu hodisa “Hyon Bin sindromi” deb nom oldi.
Pak Shin Xe va “Qirmizi yurak”
Li Jun Gi va Ayyu (Li Ji In) bosh rollarda suratga olingan “Qirmizi yurak” tarixiy koreys seriali chiqqaniga 9 yil bo‘lgan bo‘lsa-da, hamon ko‘plab tomoshabinlar tomonidan sevib tomosha qilinmoqda. Koryo sulolasining to‘rtinchi valiahd shahzodasi Van So va tanasida XXI asr qizi Ko Xa Jin joylashgan yosh aristokrat ayol Xe Suning dramatik sevgi qissasi vatanida katta shov-shuvga sabab bo‘lmagan bo‘lsa-da, chet ellarda bu serial haqiqiy sensatsiyaga aylandi.
Suratga olish ishlariga tayyorgarlik ko‘rish jarayonida serial ijodkorlari bosh rolni “Sen go‘zalsan”, “Merosxo‘rlar” va “Pinokkio” kabi romantik seriallar yulduzi, aktrisa Pak Shin Xega topshirishni istashgan. . Biroq Pak Shin Xe ishi ko‘pligi tufayli bu taklifdan voz kechishga majbur bo‘ldi va 2016-yilda “Shifokorlar” seriali hamda “Birodar” filmida bosh rollarni ijro etdi.
Xe Su roli mashhur koreys qo‘shiqchisi Ayyuga nasib etdi. U bundan oldin ham bir nechta seriallarda rol o‘ynagandi. Saroy va romantik ehtiroslar girdobiga tushib qolgan yosh aristokrat ayol obrazi yosh aktrisaning ijrochilik mahoratini jiddiy sinovdan o‘tkazdi, biroq u bu vazifani a’lo darajada uddaladi. Li Jun Gi va Ayyu qahramonlarining ekrandagi juftligi serialning haqiqiy ko‘rkiga aylandi.
Yun In Xe va “O‘zga sayyoralik mahbubim”
Kim Su Xyon va Chon Ji Xyon bosh rollarda ijro etgan “O‘zga sayyoralik mahbubim” nomli fantastik romantik drama 400 yildan beri Yerda yashayotgan o‘zga sayyoralik To Min Jun va g‘alati fe’l-atvorli aktrisa Chxon Son-i o‘rtasidagi muhabbat qissasini hikoya qiladi. Dastlab bosh rol aktrisa Yun In Xega berilgan edi. U mashhur “Shahzodaning birinchi qahvaxonasi” dramasida o‘zini yigit qilib ko‘rsatishga majbur bo‘lgan Ko In Chxan ismli qiz rolini ijro etgani bilan tanilgan edi. Biroq aktrisa oshkor qilinmagan shaxsiy sabablarga ko‘ra rolni rad etadi. Keyinchalik Yun In Xe “O‘zga sayyoralik mahbubim” filmida rol o‘ynashdan voz kechganidan afsuslanganini tan oldi.
Natijada o‘zga sayyoralikka ko‘ngil qo‘ygan aktrisa Chxon Son-i obrazini Chon Ji Xyon ajoyib tarzda gavdalantirdi. Kim Su Xyon bilan birgalikda ular tomoshabinlarning sevimli juftligiga aylandi. Ularning qahramonlari kadrda iste’mol qilgan koreys qovurilgan tovug‘i esa serial namoyishi tugagach, dunyoning turli mamlakatlarida haqiqiy fenomenga aylandi.
Chon Gin Sok va “Guldan ham go‘zal yigitlar”
“Guldan ham go‘zal yigitlar” nomli romantik koreys serialining boy oila vorisi Go Jun Pyo va oddiy kambag‘al qiz Gim Jan Di o‘rtasidagi sevgi tarixi allaqachon afsonaviy darajaga yetgan. Dastlab, bosh erkak rolini ijro etish uchun o‘sha paytda “Xon Gildon” tarixiy serialidagi asosiy rollardan biri bilan tanilgan koreys aktyori Jang Gin Sok tanlangan edi. Biroq Jang Gin Sok boshqa loyihani tanlaydi. U klassik musiqa va simfonik orkestr sozandalariga bag‘ishlangan “Bethoven virusi” serialida bosh rolni ijro etadi.
F4 deb ataluvchi to‘rtta chiroyli va badavlat yigitlar sardori Go Jun Pyo rolini yosh koreyalik aktyor Li Min Ho qo‘lga kiritdi va bu uning uchun haqiqiy shuhrat cho‘qqisi bo‘ldi. Serial butun dunyo bo‘ylab katta shov-shuvga sabab bo‘ldi va Li Min Honi Osiyoning haqiqiy superyulduziga aylantirdi. Jang Gin Sok esa o‘z navbatida “Sen go‘zalsan” musiqiy-romantik serialida yulduzlik lahzalarini boshdan kechirdi.
Izoh (0)