Sardor Rustamboyev O‘zbekiston Maldiv Respublikasidagi (qarorgohi Dehli shahrida joylashgan) birinchi elchisi etib tayinlandi. Bu haqda “Dunyo” AA xabar berdi.
Elchi bugun ushbu mamlakat prezidenti Muhammad Muizzuga ishonch yorliqlarini topshirdi.
Tantanali marosimdan so‘ng bo‘lib o‘tgan suhbat chog‘ida O‘zbekiston va Maldiv o‘rtasidagi siyosiy, savdo-iqtisodiy, investitsiyaviy, madaniy-gumanitar va boshqa sohalardagi munosabatlarning hozirgi holati hamda kelajakdagi rivojlanish istiqbollari muhokama qilindi.
Tomonlar ijtimoiy-iqtisodiy hayotning turli yo‘nalishlarida ikki tomonlama hamkorlikni yanada rivojlantirish uchun katta imkoniyatlar mavjudligini taʼkidladi.
Prezident Muhammad Muizzu Maldiv O‘zbekiston bilan BMT, IHT, boshqa xalqaro va mintaqaviy tashkilotlar doirasida tomonlarni qiziqtirgan masalalar, jumladan, iqlim o‘zgarishi, barqaror rivojlanish hamda mintaqaviy xavfsizlik bo‘yicha hamkorlikni yanada mustahkamlashga tayyorligini bildirdi.
Alohida eʼtibor turizm va oliy taʼlim yo‘nalishida sheriklikni rivojlantirishga qaratildi. Xususan, O‘zbekiston oliy taʼlim muassasalarida Maldiv talabalarini o‘qitish istiqbollari muhokama qilindi. Ikki davlat o‘rtasida to‘g‘ridan-to‘g‘ri reyslarni ochish, viza rejimini soddalashtirish va qo‘shma sayohat paketlarini ishlab chiqish imkoniyatlarini ko‘rib chiqishga kelishildi.
Tomonlar oliy va yuqori darajadagi tashriflar tashkil qilish, tadbirkorlar hamda boshqa soha vakillari delegatsiyalari almashinuvini yo‘lga qo‘yish yuzasidan fikr bildirdi.
Maʼlumot uchun, O‘zbekiston va Maldiv Respublikasi o‘rtasidagi diplomatik munosabatlar 1994-yil 7-dekabr kuni o‘rnatilgan.
Sardor Rustamboyev Dehlida 2024-yil yanvar oyida o‘z faoliyatini boshlagan. Bundan oldin u O‘zbekistonning Fransiya va Portugaliyadagi diplomatik vakolatxonasiga rahbarlik qilgan.
Izoh (0)