AQSH hukumati Falastin davlatining yo‘l xaritasi parametrlarini belgilash hamda Isroil xavfsizligini kafolatlash bo‘yicha kelasi hafta Nyu Yorkda bo‘lib o‘tadigan BMT anjumanini tanqid qildi. Shuningdek unda qatnashayotgan davlatlarni oqibatlardan ogohlantirdi.
E‘tiborlisi, mazkur tadbir Qo‘shma Shtatlarning eng yaqin ittifoqchilari hisoblangan Fransiya va Saudiya Arabistoni hamkorligida tashkil etilmoqda.
“Biz hukumatlarni ushbu anjumanda ishtirok etmaslikka chaqiramiz, chunki uni G‘azo urushini to‘xtatish va garovga olinganlarni ozod qilish bo‘yicha hayotiy muhim sa’y-harakatlarga zid, samarasiz harakat deb bilamiz", deyiladi AQSH tomonidan yuborilgan diplomatik telegrammada.
Avvalroq Fransiya prezidenti Emmanuel Makron Isroil tomonidan bosib olingan hududlarda Falastin davlati tan olish imkoniyatini ochiq aytib o‘tgan edi. Bu Tel-Aviv, jumladan Netanyaxu tomonidan keskin tanqidlar bilan qabul qilingan.
“AQSH, bir tomonlama tarzda, hali mavjud bo‘lmagan, shartli Falastin davlatining tan olinishi harakatlariga qarshi. Bunday qadam mojaroni yakunlashda jiddiy huquqiy va siyosiy to‘siqlar yaratadi, urush vaqtida Isroilga bosim o‘tkazadi va natijada uning dushmanlariga foyda keltiradi”, deyiladi diplomatik maktubda.
Qo‘shma Shtatlar 1990-yillardan buyon Falastin va Isroil uchun ikki davlat yechimni ritorik darajada qo‘llab-quvvatlab keladi. Unga ko‘ra, G‘azo va G‘arbiy Sohilda Falastin davlati tashkil etiladi. Isroil esa 1967-yilgi xalqaro tan olingan chegaralarga qaytadi.
Biroq Donald Trampning birinchi prezidentlik davrida Oq uy mazkur tamoyildan chekindi. Qo‘shma Shtatlarning Tel-Avivdagi elchixonasi Quddus shahriga ko‘chirilgani bunga ko‘plab misollardan biridir. Ammo u Oq uyga qaytganidan qariyb 5 oy o‘tgan bo‘lsa-da, hozircha “Ikki davlat yechimi” masalasida aniq pozitsiya bildirgani yo‘q. Lekin Tramp tomonidan Isroilga tayinlangan elchi Mayk Hakabi “mustaqil Falastin davlati endilikda AQSH tashqi siyosatining amaldagi maqsadi bo‘lmasligi mumkin”, deb aytdi.
Vashington tomonidan xalqaro anjuman ishtirokchilariga yuborilgan diplomatik telegrammaning 7-oktyabr voqealariga oid qismi, ayniqsa, bahs-munozaralarni keltirib chiqardi.
“Agar Falastin davlati bir tomonlama tan olinsa, bu 7-oktyabr kunini Falastin mustaqillik kuniga aylantirgan bo‘lardi”, deyiladi unda.
AQSH bu anjumanni Falastin davlatining bir tomonlama tan olinishiga olib keluvchi xavfli diplomatik qadam deb hisoblamoqda. Shuningdek xalqaro tadbir G‘azoda urushni tugatishga qaratilgan sa’y-harakatlarga zarar yetkazishi mumkinligini iddao qilyapti. Shu bois kelasi hafta Nyu-Yorkda bo‘lib o‘tadigan anjumanda diplomatik keskinlik kuchayishi ehtimoldan holi emas.
Izoh (0)