Fransiya prezidenti Emmanuel Makron Isroilga qarshi siyosat olib borishni davom ettirmoqda. Bu haqda Isroil TIVning X ijtimoiy tarmog‘idagi bayonotida ma’lum qilingan.
“Prezident Makronning Isroil davlatiga qarshi kurashi davom etmoqda. Makronni haqiqat qiziqtirmaydi. Hech qanday gumanitar qamal yo‘q. Bu ochiqdan-ochiq yolg‘on”, deyiladi vazirlik sahifasida.
30-may kuni Makron G‘azo sektoriga to‘liq hajmda gumanitar yordam yetkazib berish qayta boshlanmasa, Yevropa Isroilga nisbatan choralarni kuchaytirishi kerakligini ta’kidlagan. Uning aytishicha, Isroilning G‘azoga insonparvarlik yordamini olib kirishga qo‘ygan taqiqi hali to‘liq bekor qilinmagan, shu sababli G‘azodagi gumanitar vaziyat og‘irlashmoqda.
O‘z navbatida, Isroil tashqi ishlar vazirligi bu hafta G‘azo sektoriga 900 ga yaqin gumanitar yordam ortilgan yuk mashinasi kiritilganini, yana yuzlab yuk mashinalari BMT xodimlari tomonidan yuklarni tekshirishni kutayotganini ma’lum qildi.
Tashqi ishlar vazirligining tushuntirishicha, G‘azo insonparvarlik jamg‘armasi homiyligida gumanitar yordam tarqatish markazlari ish boshlagan bo‘lib, buning natijasida G‘azo sektori aholisi allaqachon ikki million oziq-ovqat ratsioni va o‘n minglab yordam to‘plamlarini olgan.
“Ammo Makron jihodchi terrorchilarga ta’sir o‘tkazish o‘rniga ularni Falastin davlati bilan taqdirlashni xohlamoqda. Makronning sanksiyalarga erishish istagi ham bir vaqtning o‘zida bir nechta tomondan hujumga uchragan va yo‘q qilinishga urinilayotgan Isroilga qarshi qaratilgan”, deya ta’kidladi Isroil TIV.
Axios axborot agentligi xabariga ko‘ra, iyun oyida Fransiya ham shunday qaror qabul qilishi mumkin. Prezident Emmanuel Makron aprel oyida France 5 telekanaliga bergan intervyusida Falastinni tan olish yaqin oylar ichida hal qilinadigan masala ekanligini ta’kidlagan edi.
Izoh (0)