Rossiya Ukrainada urush boshlab, Yevropadagi mavjud tinchlik tartibini izdan chiqardi. Bu haqda Yevropa Ittifoqi kengashi raisi Antoniu Koshta Tiranadagi Yevropa siyosiy hamjamiyati sammitining yalpi majlisida so‘zlagan nutqida ma`lum qilgan.
“Ikkinchi jahon urushidan keyin, biz BMT nizomi, xalqaro huquq, savdo va hamkorlikni kengaytirishga asoslangan yangi dunyo tartibini shakllantirdik. Bu xalqaro tartib mukammal bo‘lmasa-da, u tinchlik, ayniqsa Yevropada, o‘sib borayotgan farovonlik uchun mustahkam poydevor yaratdi. Bugun esa ushbu tartib har tomonlama buzilmoqda”, deya ta’kidlagan Antoniu Koshta.
Uning so‘zlariga ko‘ra, Ukrainadagi urush Yevropa qit’asiga to‘laqonli urushni qaytargan.
“Bu urush butun xalqaro hamjamiyatga, biz uchun qadrli bo‘lgan barcha tamoyillarga: milliy suverenitet, xalqaro chegaralarning daxlsizligi va hududiy yaxlitlikka qarshi hujumdir”, dedi u.
Yevroittifoq rahbari o‘nlab yillar davomida xalqaro savdo va iqtisodiy hamkorlik xalqlarni birlashtirganini hamda o‘zaro farovonlikka hissa qo‘shganini alohida ta’kidlagan.
“Bugungi kunda esa bu o‘zaro bog‘liqlik hokimiyat va bosim vositasiga aylanib bormoqda”, deya qo‘shimcha qildi Yevroittifoq rahbari.
XXI asrda davom etayotgan qurolli mojarolar haqida so‘z yuritarkan, u G‘azo sektoridagi vaziyatga alohida e’tibor qaratgan.
Izoh (0)