Suriyaning o‘tish davri prezidenti Ahmad ash-Shara’a sentyabrda AQSHga tashrif buyuradi. Bu haqda Syria TV telekanali xabar bermoqda.
Qayd etilishicha, ash-Shara’a BMT yig‘ilishida ham so‘zga chiqadi. Bu Suriya prezidentining so‘nggi 60 yil ichida jahon tashkilotidagi ilk nutqi bo‘ladi.
Suriyaning muvaqqat hukumati 2024-yil 9-dekabrda, Bashar Asad rejimi qulashidan so‘ng tashkil etilgan edi. 2025-yil 29-yanvarda qonun chiqaruvchi hokimiyatning oliy organi bo‘lmish Xalq kengashi rasman tarqatib yuborildi va O‘tish davri hukumati Muvaqqat qonunchilik kengashiga saylovlar o‘tkazilishini e’lon qildi. 2025-yil 29-martda birinchi o‘tish davri hukumati o‘z faoliyatini yakunlab, o‘rnini ikkinchi o‘tish davri hukumatiga bo‘shatib berdi. Bosh vazir lavozimi bekor qilindi va hukumatni Suriya prezidenti boshqara boshladi.
Aprel oyida Suriya tashqi ishlar vaziri Asad ash-Shayboniy Nyu Yorkdagi Birlashgan Millatlar Tashkiloti (BMT) qarorgohi binosida o‘z mamlakatining yangi bayrog‘ini ko‘tardi. U bu voqeani “tarixiy” deb atadi. Diplomatning so‘zlariga ko‘ra, suriyaliklar bu qadamni 14 yil davomida kutishgan. TIV rahbarining BMT qarorgohiga tashrifi Suriyaning yuqori martabali delegatsiyasi 20 yildan ortiq vaqt ichida birinchi marta Xalqaro valyuta jamg‘armasi va Jahon banki vakillari bilan uchrashuvlarda ishtirok etganidan so‘ng amalga oshirildi.
May oyi o‘rtalarida AQSH prezidenti Donald Tramp Saudiya Arabistonida ash-Shara’a bilan o‘tkazilgan uchrashuvni sharhlab, Suriyaning yangi rahbari “baquvvat yigit” va “kuchli o‘tmishga ega kurashchi” ekanini ta’kidladi. Shuningdek, Amerika rahbari Suriyaga qarshi joriy etilgan sanksiyalarni bekor qilish to‘g‘risidagi qarorini e’lon qildi va buni “unga imkoniyat berish zarurligi” bilan izohladi.
29-may kuni AQSH prezidentining Suriya bo‘yicha maxsus vakili Tomas Barrak 2012-yilda elchixona yopilganidan beri ilk bor AQSH elchisi qarorgohi ustida Amerika bayrog‘ini ko‘tardi.
Izoh (0)