Rossiyaning Amur viloyatidagi maktab stadionda yuz bergan ommaviy mushtlashuvdan so‘ng O‘zbekistonning 11 nafar fuqarosi hibsga olindi.
-kdnjbC65.avif)
Hodisa 25-may kuni Svobodnenskiy tumanidagi stadionda yuz bergan. O‘yin vaqti turli jamoalardan kelgan ishtirokchilar o‘rtasida mojaro kelib chiqqan. Mushtlashuv oqibatida 27 yoshli yigit o‘rtacha darajadagi tan jarohati olib, shifoxonaga yotqizilgan.
Qo‘lga olinganlarning barchasi ma’muriy modda bo‘yicha mayda bezorilikda aybdor deb topilgan. Sud ularni hibsga olishga hukm qilgan. To‘qqiz kishi 14 kun, yana ikki nafari esa 12 kun hibsda qoladi.
Bundan tashqari qasddan badanga o‘rtacha og‘ir shikast yetkazish holati bo‘yicha jinoyat ishi qo‘zg‘atilgan. U uch yilgacha ozodlikdan mahrum qilishgacha bo‘lgan jazoni nazarda tutadi.
Huquqbuzarlarning bir qismi aybini tan olib, pushaymon bo‘lgani sababli, ularga nisbatan yengilroq jazo belgilangan. Biroq huquqbuzarlik bir guruh shaxslar tomonidan sodir etilgani jazoni og‘irlashtiruvchi holat sifatida baholangan, deyiladi xabarda.
27-may kuni Rossiya Tergov qo‘mitasi raisi Aleksandr Bastrikin Amur viloyatida muhojirlar ishtirokida sodir bo‘lgan ommaviy janjal bo‘yicha jinoiy ish qo‘zg‘atishni va bu haqda o‘ziga hisobot taqdim etishni topshirgandi.
Izoh (0)