Rossiyaning “Adolatli Rossiya” partiyasi deputatlari migrantlarning pul o‘tkazmalari uchun boj joriy etishni taklif qildi. Bu haqda partiya yetakchisi Sergey Mironov xabar berdi.
Deputatlar tegishli taklif bo‘yicha qonun loyihasini tayyorlaydi va parlamentning quyi palatasiga kiritadi.
“Migrantlarning pul o‘tkazmalariga davlat bojini joriy etish lozim... Agar 3 foizlik boj joriy etilsa, g‘azna faqatgina ikki mamlakatga — Qirg‘iziston va O‘zbekistonga — o‘tkazmalardan 45 milliard rubldan ortiq mablag‘ oladi. Nahotki bizga shunday pul kerak bo‘lmasa?! Qonunchilik tashabbusini tayyorlab, Davlat Dumasiga kiritamiz”, ta’kidladi Mironov.
U 2024-yil yakunlariga ko‘ra, Rossiyadagi Qirg‘iziston va O‘zbekiston fuqarolari o‘z vataniga 14 milliard dollardan ortiq mablag‘ o‘tkazganini aytdi.
“Migrantlarning aksariyati esa Rossiyada hech qanday soliq to‘lamaydi, ayni paytda ular mamlakatdan katta miqdordagi mablag‘larni olib chiqib ketmoqda. 2021-yilda hukumatda pul o‘tkazmalari uchun qo‘shimcha komissiya masalasi muhokama qilingan edi, lekin Moliya vazirligi bu ishni cho‘zib yubordi.
Rossiya fuqarolari uchun tariflar, aksizlar va yig‘imlarni oshirish masalasida bizning amaldorlarimiz hech qachon kechikishmaydi, ammo chet elliklarning manfaatlariga tegish kerak bo‘lganda, darhol bahona izlashni boshlaydi”, dedi Mironov.
2025-yil 5-fevraldan Rossiyada deportatsiyaning migratsiya rejimi joriy etiladi. Prezident imzolagan qonunlardan biri Ichki ishlar vazirligiga Rossiya Federatsiyasidan sud qarorisiz migrantlarni chiqarib yuborishga ruxsat beradi. Ilgari buni faqat sud va chegara xizmati amalga oshirishi mumkin edi.
Izoh (0)