Rossiyada 1-apreldan boshlab muhojirlarga oid muhim o‘zgarishlar kuchga kirdi. Ulardan biri O‘zbekistonda olingan haydovchilik guvohnomasi bilan Rossiyada avtomobil haydashni taqiqlaydi. Bu haqda “RBK” xabar berdi.
Taqiq Rossiya fuqaroligini, yashash guvohnomasini yoki vaqtincha yashash ruxsatnomasini olgan va mamlakatda bir yildan ortiq yashayotgan xorijliklarga taalluqlidir. Ularning xorijiy haydovchilik guvohnomalari 2025-yil 1-apreldan yaroqsiz hisoblanadi.
Yangi qonunga ko‘ra, chet el fuqarolari va fuqaroligi bo‘lmagan shaxslar Rossiya fuqaroligini yoki yashash guvohnomasini olganidan bir yil o‘tgach, xorijiy haydovchilik guvohnomasi bilan avtomobil boshqarish huquqidan mahrum bo‘ladi.
Bunday fuqarolar yana avtomobil haydash uchun Rossiyada imtihon topshirib, mahalliy haydovchilik guvohnomasini olishi kerak. Xorijiy guvohnomani shunchaki “GAI”da almashtirish mumkin emas. Qoidabuzarlik uchun 15 000 rublgacha jarima belgilangan.
1-apreldan amalga qiladigan boshqa o‘zgarishlar quyidagicha:
♦ Test sinovisiz migrant bolalar maktabga qabul qilinmaydi. Migrantlarning farzandlari endi maktabga kirish uchun rus tilidan imtihon topshirishi kerak. Birinchi sinf o‘quvchilari faqat og‘zaki suhbatdan o‘tadi. Qolganlari esa og‘zaki va yozma. O‘quvchilar 5 balldan kamida 3 ball olishi kerak. Qayta imtihon topshirish 3 oydan keyin bo‘lib o‘tadi. Migrantlarning farzandlari maktabga qabul qilinishi uchun rus tili imtihonida 90 foiz to‘g‘ri javob berishi kerak. Davlat Dumasi spikeri Vyacheslav Volodinning aniqlik kiritishicha, materiallar o‘qitishning to‘rt bosqichi uchun ishlab chiqilgan:
- 1-sinf – 10 ta topshiriqdan 9 tasini;
- 2-5-sinflar – 20 ta topshiriqdan 18 tasi;
- 6 - 9-sinflar – 22 ta topshiriqdan 20 tasi;
- 10 - 11-sinflar – 24 ta topshiriqdan 22 tasini yechish kerak.
♦ Muhojirlar uchun SIM-kartalar soniga cheklovlar joriy etildi, maksimal 10 ta SIM-karta. Bu chora, firibgarlikka qarshi kurashish maqsadida amalga oshirildi.
Bundan tashqari, 30-aprelgacha Rossiya hududida bo‘lishini qonuniylashtirmaganlar “nazorat qilinadigan shaxslar reyestri”ga kiritiladi. Bu ro‘yxatdan o‘tish muammolariga, xizmat ko‘rsatishni rad etishga va ehtimoliy deportatsiyaga sabab bo‘lishi mumkin.
Izoh (0)