Belgiya mamlakat hududi orqali Isroilga harbiy yuklar o‘tkazishni taqiqladi. Bu haqda Euronews xabar berdi.
Tegishli qaror Belgiya sudi tomonidan Flandriya hukumatiga nisbatan qo‘llangan va u Antverpen shahri orqali o‘tadigan yuklarga taalluqli bo‘ladi. Qarorga ko‘ra, Isroilga jo‘natilgan har qanday qurol-yarog‘ uchun 50 ming yevro miqdorida jarima belgilanadi. Flandriya hukumati hozircha qaror yuzasidan munosabat bildirmagan.
Isroilga harbiy texnika tranzitini taqiqlash bo‘yicha shikoyat iyun oyida 4 nafar flamand tashkiloti tomonidan kiritilgan. Ularning da’vo qilishicha, Antverpenda Isroilga ketayotgan yuklar tarkibida tank va zirhli texnikalarda ishlatiladigan maxsus konussimon rolikli podshipnik tagliklari mavjud bo‘lgan. Ular Isroilning Ashdod shahridagi “Ashot Ashkelon” kompaniyasiga yuborilishi kerak edi. Mazkur kompaniya “Merkava” tanklarini ishlab chiqaradi va ular G‘azoda olib borilayotgan harbiy amaliyotlarda ishlatilmoqda.
Belgiya dastlab 2009-yilda yahudiy davlatiga qurol eksportini taqiqlagan, biroq Flandriya mintaqasi shu paytgacha Isroilga yuborilayotgan yuklar tarkibini tekshirmagani ayon bo‘ldi. Shundan so‘ng, sud Flandriya hukumatiga harbiy texnika tranzitini taqiqlovchi buyruq berishga qaror qilgan. Sudya iyul oyida bu holatni xalqaro majburiyatlarni buzish deb topgan.
Izoh (0)