Rossiyada migrantlar nomiga bittadan ortiq SIM-kartani rasmiylashtirishni taqiqlash taklif etilmoqda, deb xabar berdi “TASS”.
Bu ko‘zda tutilgan qonun loyihasi Rossiya Davlat dumasining Mehnat, ijtimoiy siyosat va faxriylar ishlari bo‘yicha qo‘mitasi raisi Yaroslav Nilov tomonidan ishlab chiqildi. Deputat fikricha, bunday cheklov mamlakatda xavfsizlik darajasini oshirish, kommunikatsiyalar ustidan nazoratni ta’minlash va milliy manfaatlarni himoya qilishga xizmat qiladi.
Uning so‘zlariga ko‘ra, “Terrorizm, josuslik, firibgarlik, kibertahdidlar bilan bog‘liq xatarlar kuchayib borayotganini inobatga olib, mamlakatda chet elliklar va fuqaroligi bo‘lmagan shaxslarning Rossiyada SIM-kartalarga egalik qilishini cheklash choralarini ko‘rish zarur”.
Mamlakatda 2025-yil 1-yanvardan boshlab migrantlarga o‘z nomlariga 10 tadan ortiq SIM-karta olishni taqiqlovchi tartib kuchga kirgan. Xorijiy fuqarolar va fuqaroligi bo‘lmagan shaxslar aloqa operatorlari bilan faqat shaxsini tasdiqlovchi hujjatni ko‘rsatgan holda va biometrik ma’lumotlardan majburiy foydalangan holda idoralarga shaxsan kelib shartnomalar tuzishi mumkin.
Deputat Yaroslav Nilov Rossiya maktablarida o‘qish uchun rus tili imtihonidan uch marta o‘ta olmagan migrantlarning farzandlarini vataniga qaytarib yuborishni ham taklif qilgandi. Rossiya Davlat dumasida migrant ayollar uchun bepul tug‘uruqni taqiqlash ham taklif qilingan.
Izoh (0)