Sankt Peterburgda 2021-yilda sodir etilgan qotillik uchun qidiruvda bo‘lgan O‘zbekiston fuqarosi Salvadordan ekstraditsiya qilindi.
Rossiya Ichki ishlar vazirligi ma’lumotlariga ko‘ra, bu ikki davlat o‘rtasida gumondor shaxsni o‘tkazish bo‘yicha tarixdagi birinchi holatdir. Erkak janjal chog‘ida bir kishini o‘limiga sabab bo‘lgan, shundan so‘ng chet elga qochib ketgan.
2023-yil may oyida Interpol uni uzoq vaqtdan beri dunyodagi eng xavfli davlatlardan biri hisoblangan Markaziy Amerikadagi eng kichik davlat — Salvadorda hibsga oldi. Rossiya Bosh prokuraturasi ekstraditsiya to‘g‘risida iltimosnoma kiritdi va u qanoatlantirildi. 25-may kuni gumonlanuvchi Rossiya huquq-tartibot idoralariga topshirilib, Moskvaga yetkazilgan.
Rossiya Ichki ishlar vazirligining rasmiy vakili Irina Volk ta’kidlashicha, bu qaror jinoiy ta’qib sohasidagi xalqaro hamkorlikning noyob namunasi bo‘ldi.
2024-yil dekabrida Rossiya Qozog‘istonga 7 million dollarlik firibgarlik ishida gumonlanayotgan o‘zbekistonlik ayolni ekstraditsiya qilgandi. 2025-yil fevralida o‘g‘rilik va katta miqdorda tovlamachilik jinoyatlarini sodir etganlik uchun xalqaro qidiruvga berilgan shaxs Misrdan O‘zbekistonga ekstraditsiya qilingandi. Buxoroda firibgarlik sodir etib qochib yurgan o‘zbekistonlik mart oyida Rossiyada ushlangandi. O‘sha oyda Toshkentda bir necha kishini kaltaklagan erkak Qozog‘istonda qo‘lga olinib, O‘zbekistonga ekstraditsiya qilingandi.
Izoh (0)