Markaziy Osiyo, Kavkazorti va boshqa sobiq sovet respublikalaridan kelgan mehnat muhojirlariga nisbatan yondashuvlarni qat’iylashtirish Rossiyaning uzoq muddatli manfaatlariga mos kelmaydi. Bu haqda Rossiya tashqi ishlar vaziri Sergey Lavrov Davlat dumasidagi hukumat soatida ma’lum qildi.
Tartib-intizomni nazorat qilish zarur. Muhojirlar keladigan bir qator geografik yo‘nalishlar bo‘yicha ko‘plab qonunbuzarliklar qayd etilgan. Biz ularning xulq-atvorini nazorat qilishni kuchaytirishimiz kerak. Biroq to‘siqlar qo‘ymaslik, ayniqsa viza rejimini joriy etmaslik lozim. Mavjud tartibga nisbatan qo‘shimcha choralar aynan nazoratni kuchaytirishga qaratilgan, mehnat migratsiyasiga to‘siqlar yaratishga emas, dedi diplomat.
Lavrovning aniqlik kiritishicha, Rossiya TIV Yevrosiyo iqtisodiy ittifoqiga (YOII) a’zo davlatlar elchilari bilan maxsus uchrashuvlar o‘tkazib, ularga qonunchilik siyosatining mohiyatini tushuntirgan.
Bularning barchasini eng yaqin ittifoqchilar bilan munosabatlarda qandaydir sun’iy to‘siqlar qo‘ymasdan amalga oshirish mumkin, deya ta’kidladi Lavrov.
Joriy yilning 1-yanvaridan boshlab Rossiya migratsiya siyosatidagi o‘zgarishlar kuchga kirdi, unga ko‘ra xorijliklarning Rossiyada vizasiz vaqtincha bo‘lish muddati ikki baravarga – yiliga jami 180 kundan 90 kungacha qisqartirildi. Bundan tashqari, 5-fevraldan boshlab chegarachilarga mamlakatga kirishni rad etish uchun ko‘proq asoslar berildi. Xususan, agar xorijlik shaxs Rossiya xavfsizligiga tahdid solishi mumkin bo‘lsa, ular boshqa idoralarga murojaat qilmasdan, joyida rad etish to‘g‘risida qaror qabul qilishlari mumkin bo‘ladi.
Davlat Dumasi 2024-yilda migratsiya siyosatini qattiqlashtiradigan 14 ta qonun qabul qildi. Duma spikeri Vyacheslav Volodin migratsiyani taqiqlash rejalashtirilmayotganini aytib, ammo chet el fuqarolari uchun ishlashga ruxsat berilgan sohalar sonini cheklash kerak, degan fikrni bildirdi.
Tarbiya, ta’lim va sog‘liqni saqlash — bu mamlakatimiz fuqarolari mehnat qilishi kerak bo‘lgan sohalar. Ularga muhojirlarni jalb qilishni noto‘g‘ri deb hisoblaymiz, degan edi u.
Izoh (0)