Rossiyaning Sank Peterburg shahrida 28 yoshli o‘zbekistonlik ishchi tomdan tushib ketishi oqibatida halok bo‘ldi. Rossiya Tergov qo‘mitasi holat yuzasidan jinoiy ish qo‘zg‘atdi.
Ma’lum qilinishicha, 23-may kuni Kolomenskaya ko‘chasidagi ko‘p qavatli uy tomida ishlayotgan O‘zbekiston fuqarosi balandlikdan tushib ketgan. U avtomobil ustiga tushib, boshi va umurtqa pog‘onasidan og‘ir jarohat olgan. Voqea joyiga yetib kelgan tez yordam xodimlari uning vafot etganini aniqlagan.
Marhum “Injenerik” kompaniyasida tom yopish ishlarini olib borgan. Tergov ma’lumotlariga ko‘ra, u xavfsizlik moslamalarini noto‘g‘ri mahkamlab, besh qavatli uyning tomidan tushib ketgan. Marhumning jasadi sud-tibbiy ekspertizasiga yuborilgan.
Tergov qo‘mitasi Rossiya Jinoyat kodeksining 216-moddasi 2-qismi (ehtiyotsizlik oqibatida odam o‘limiga olib kelgan holda xavfsizlik qoidalarini buzish) bo‘yicha jinoyat ishi ochgan. O‘zbekiston fuqarosi ta’mirlash ishlariga kerakli xavfsizlik vositalarisiz (anker liniyasi va himoya jaketisiz) jalb etilgani aytilmoqda. Hozirda voqea tafsilotlari o‘rganilmoqda.
Izoh (0)