Interpolning O‘zbekiston Milliy markaziy byurosi xodimlari kuzatuvi ostida xalqaro qidiruvda bo‘lgan ikki nafar ayol Maskat shahridan Toshkentga olib kelindi. Bu haqda Milliy markaziy byuro xabar berdi.
Maʼlum qilinishicha, Ummon hududida xalqaro qidiruvda bo‘lgan ikki nafar ayol ushlandi. 23-may kuni O‘zbekiston Interpol Milliy markaziy byurosi xodimlari tomonidan ularning ekstraditsiyasi amalga oshirildi. Ikkala ayol ham firibgarlik va odam savdosi bilan ayblanib, qidiruvda bo‘lgan.
Firibgarlik bilan bog‘liq xatti-harakati uchun qidiruvda bo‘lgan shaxslarni ekstraditsiya qilish jarayonini amalga oshirish maqsadida kuzatuv guruhi Ummonning Maskat shahriga jo‘nab ketdi. Interpol Maskat Milliy markaziy byurosi vakillari bilan uchrashuv davomida O‘zbekiston huquqni muhofaza qilish organlari tomonidan xalqaro miqyosda qidiruv eʼlon qilingan, odam savdosi bilan shug‘ullanishda gumon qilinayotgan yana bir ayol qo‘lga olingani maʼlum bo‘ldi.
O‘tkazilgan uchrashuv natijasida soddalashtirilgan ekstraditsiyani amalga oshirish bo‘yicha kelishuvga erishildi.
Shu tariqa qidiruvdagi shaxslar sud oldida javobgarlikka tortilishi va munosib jazo olishi uchun O‘zbekistondagi Interpol Milliy markaziy byurosi xodimlariga topshirildi.
2024-yil dekabrida Rossiya Qozog‘istonga 7 million dollarlik firibgarlik ishida gumonlanayotgan o‘zbekistonlik ayolni ekstraditsiya qilgandi. 2025-yil fevralida o‘g‘rilik va katta miqdorda tovlamachilik jinoyatlarini sodir etganlik uchun xalqaro qidiruvga berilgan shaxs Misrdan O‘zbekistonga ekstraditsiya qilingandi. Buxoroda firibgarlik sodir etib qochib yurgan o‘zbekistonlik mart oyida Rossiyada ushlangandi. O‘sha oyda Toshkentda bir necha kishini kaltaklagan erkak Qozog‘istonda qo‘lga olinib, O‘zbekistonga ekstraditsiya qilingandi.
Izoh (0)