Janubiy Koreyaning Samsung Display kompaniyasi 2024-yilda Rossiyaning oltin, volfram va tantalidan foydalanishni to‘xtatdi. Bu haqda kompaniyaning hisobotiga tayanib, “Kommersant” xabar berdi.
Hujjatda 2022 va 2023-yillarda Rossiyadan ushbu metallar yetkazib berilgani to‘g‘risidagi ma’lumotlar ko‘rsatilmagan. 2021-yilda esa kompaniya Rossiyaning 11 ta korxonasidan xomashyo olgan. Volfram chip ichidagi metall o‘tkazgichlarda, tantal kremniy va mis orasidagi izolyatsiya qatlamida, oltin esa mikrosxemadagi kristallarni korpus bilan ulashda qo‘llanilgan.
Samsung Display — Samsung korporatsiyasining sho‘ba korxonasi bo‘lib, televizorlar, smartfonlar, noutbuklar va boshqa elektronika uchun displeylar ishlab chiqaradi. Uning mahsulotlaridan nafaqat Samsung qurilmalari, balki boshqa ishlab chiqaruvchilar, xususan, Apple ham foydalanmoqda.
Samsung 2024-yil may oyidan boshlab LG bilan birgalikda iPhone 16 Pro uchun displeylarni ommaviy ravishda ishlab chiqarmoqda.
Rossiya metallaridan voz kechish ikkilamchi sanksiyalar ostida qolish xavfi bilan bog‘liq, deydi rossiyalik ma’lumotlarni saqlash tizimlarini ishlab chiquvchilar konsorsiumi direktori Oleg Izumrudov.
Uning so‘zlariga ko‘ra, Janubiy Koreya kompaniyasi xomashyoni avvalgidek Rossiyadan, biroq vositachilar orqali sotib oladi.
Biroq Rossiya OAVlari ta’kidlaganidek, aynan Samsung kompaniyasi Rossiya metallaridan voz kechgan — u yetkazib berish zanjirini Osiyo orqali uzaytirmagan. Shu bilan birga, bu qaror kompaniya faoliyatiga salbiy ta’sir ko‘rsatmaydi.
Rossiya uchun bu ko‘proq Janubiy Koreya kompaniyalari yaqin kelajakda Rossiya bozoriga qaytishni rejalashtirmayotgani va cheklangan savdo aloqalariga ega bo‘lishni rejalashtirayotganini anglatadi. Ya’ni ular tayyor mahsulotlarni sotishdan manfaatdor, ammo yaqin hamkorlik qilishni istamaydi, deya ta’kidladi manba.
Izoh (0)