Germaniya, Buyuk Britaniya, Fransiya va AQSH Ukrainaga yetkazib berilgan qurollardan uzoq masofaga zarba berishda foydalanish bo‘yicha qo‘yilgan cheklovlarni olib tashladi. Bu haqda Germaniya kansleri Fridrix Merts ma’lum qildi.
Ukrainaga yetkazib beriladigan qurollarning otish masofasiga endi hech qanday cheklov yo‘q. Na Buyuk Britaniya, na Fransiya, na biz tomonimizdan. Amerikaliklar tomonidan ham cheklov mavjud emas, dedi Merts.
Ta’kidlanishicha, Germaniya Ukrainani qo‘llab-quvvatlashni davom ettirish uchun “barcha imkoniyatlarni ishga soladi”. Aynan shu sababli u yaqinda Buyuk Britaniya bosh vaziri Kir Starmer, Fransiya prezidenti Emmanuel Makron va Polsha bosh vaziri Donald Tusk bilan birga “ko‘ngillilar koalitsiyasi” doirasida Ukrainaga tashrif buyurganini aytdi.
Kanslerga ko‘ra, cheklovlarning olib tashlanishi Ukrainaga, masalan, Rossiyadagi harbiy pozitsiyalarga hujum qilish yo‘li bilan, o‘zini himoya qilish imkonini beradi. U bunday holatlar ilgari juda kam hollardan tashqari kuzatilmaganini aytdi.
Kreml munosabati
Agar bunday qarorlar haqiqatan ham mavjud bo‘lsa, ular bizning siyosiy kelishuvga erishish va hozirda kelishuv doirasida amalga oshirilayotgan sa’y-harakatlarimizga mutlaqo ziddir, dedi Rossiya prezidenti matbuot kotibi Dmitriy Peskov. U uzoq masofali qurollarga cheklovlarni olib tashlash “yetarlicha xavfli yechim” ekanini ta’kidladi.
G‘arb davlatlari harbiy harakatlar davomida Ukrainaga uzoq masofali qurollar yetkazib bergan bo‘lsa-da, ulardan foydalanishga cheklovlar qo‘yib, Rossiya hududiga zarba berishni taqiqlab kelgan.
2024-yil noyabr oyida AQSHning o‘sha paytdagi prezidenti Jo Bayden ilk bor Ukrainaning Rossiya hududidagi nishonlarga zarba berishi uchun uzoq masofali ATACMS raketalaridan foydalanishiga rozilik berdi. Shuningdek, Buyuk Britaniya va Fransiya ham uzoq masofaga uchuvchi Storm Shadow qanotli raketalaridan foydalanishga qo‘yilgan cheklovlarni bekor qilgani haqida xabar tarqalgandi. Biroq G‘arb mamlakatlari hukumatlari bu ma’lumotni rasman tasdiqlamagandi.
Izoh (0)