Rossiyaning Su-57E beshinchi avlod ko‘p maqsadli qiruvchisining ilk xorijiy xaridori ma’lum bo‘ldi. Jazoir ruslardan noma’lum sonda qiruvchilar sotib olib, 2025-yildan foydalanishga kiritadi. Bu haqda “TASS” agentligiga tayanib xalqaro nashrlar yozmoqda.
Ma’lum qilinishicha, jazoirlik uchuvchilar Rossiyada maxsus tayyorgarlikni allaqachon boshlab yuborgan. Oltita birlikdan iborat dastlabki partiya 2025-yil oxirigacha yetkazib berilishi kutilmoqda. Bu bitim haqida ilk bor “Rosoboroneksport” tomonidan 2024-yilgi Airshow China ko‘rgazmasida ma’lum qilingan, biroq na xaridor, na kelishuv qiymati ochiqlangandi.
Su-57E — bu Sukhoi konstruktorlik byurosi tomonidan ishlab chiqilgan Su-57 qiruvchisining eksport varianti hisoblanadi. Samolyot 2000-yillar boshida PAK FA (Frontal aviatsiyaning istiqbolli majmuasi) dasturi doirasida ishlab chiqilgan bo‘lib, ilk parvozini 2010-yil 29-yanvarda amalga oshirgan. Seriyali ishlab chiqarish Komsomolsk-Amurdagi aviatsiya zavodi tomonidan 2019-yilda boshlangani aytiladi.
O‘sha yili imzolangan davlat shartnomasiga ko‘ra, 2028-yilga qadar Rossiya aerokosmik kuchlariga 76 ta Su-57 qiruvchilari yetkazilishi ko‘zda tutilgan. Bu mahalliy standartlar bo‘yicha uchta polkni jihozlash uchun yetarli hisoblanadi. Seriyali samolyotlarning birinchisi 2020-yil dekabr oyida xizmatga topshirilgan. 2023-yil oxiriga kelib, shu jumladan, prototiplar bilan birga jami 22 ta samolyot konveyerdan chiqqan.
Ishlab chiqarish bilan parallel ravishda modernizatsiya jarayonlari ham davom etmoqda. “Izdeliye 30” dvigateli ustida izlanishlar bunga misol bo‘la oladi. Shu kungacha ishlab chiqarilgan qiruvchilar Su-35 da qo‘llangan eski dvigatellarda parvoz qilar edi. 2027-yilga qadar yangi texnologiyani seriyali modellar bilan integratsiya qilish rejalashtirilgan.
Su-57E beshinchi avlod qiruvchi samolyotlariga xos xususiyatlarga ega: radarlarda sezuvchanlikning pastligi, supermanyovr qobiliyati va qurollarning ichki bo‘lmada saqlanishi kabilar shular jumlasidan. Samolyot turli vazifalarni murakkab jangovar sharoitlarda bajarishga mo‘ljallangan bo‘lib, har qanday ob-havoda faoliyat ko‘rsatishi mumkin. Maksimal parvoz og‘irligi 35,5 tonnani, ichki yonilg‘i zaxirasi esa 11 tonnani tashkil etadi. Samolyot 20 000 metr balandlikka ko‘tarilishi, soatiga 2 600 kilometr masofani bosib o‘tishi mumkin.
Qiruvchi kabinasi bir o‘rindiqli bo‘lib, zamonaviy integratsiyalashgan displey tizimi, kislorod ishlab chiqarish tizimi hamda “NPP Zvezda” tomonidan ishlab chiqilgan katapulta o‘rindig‘i bilan jihozlangan. U uchuvchining vazni va parvoz sharoitlariga qarab avtomatik sozlanadi.
Qurol-yarog‘ masalasiga kelganda, u 7 500 kg gacha bo‘lgan og‘irlikdagi yukni ko‘tarishi mumkin. Ular oltita ichki va o‘n ikkita tashqi osma punktlarga taqsimlanadi. Ichki bo‘linmalarda havo janglari uchun R-77M va R-74M2, yerusti nishonlari uchun esa Kh-69 va Grom-E1 kabi yuqori aniqlikdagi raketalar saqlanadi. Shunga qaramay, aksar ekspertlar uning beshinchi avlodga xosligiga shubha bildiradi. Bunga asosiy sabab uning nihoyatda yirik hajmi, stels qoplamasining yo‘qligi va eski namunadagi dvigateldir.
Izoh (0)