O‘zbekiston tovar-xom ashyo birjasining avtoraqam.uzex.uz elektron savdo platformasida o‘tkazilgan navbatdagi onlayn auksionlar natijasida jami 697 dona avtoraqam sotildi. Bu haqda birja matbuot xizmati xabar qildi.
Sotilgan avtoraqamlarning katta qismi — aniqrog‘i, 644 tasi (ya’ni 96 foizdan ortig‘i) jismoniy shaxslar tomonidan xarid qilindi. Qolgan raqamlar esa yuridik shaxslar tomonidan sotib olingan.
Savdo platformasida eng past narxda xarid qilingan avtoraqam qiymati 1 million 900 ming so‘mni tashkil etdi. Shuningdek, 20-may kuni eng yuqori narxda sotilgan “chiroyli” avtoraqam 722,3 million so‘mga baholandi.
Mazkur summa 2025-yil boshidan buyon qayd etilgan eng yuqori narx sifatida qayd etildi.
Yuqori narxga sotilgan “chiroyli” avtoraqamlar
Bundan avval avtoraqamlar onlayn auksionida sotuvga qo‘yilgan 01 888 BBB avtoraqami 965 million 250 ming so‘mga sotilgani haqida xabar berilgandi. Dastlab 337 million 500 ming so‘m boshlang‘ich narx bilan savdoga qo‘yilgan bu avtoraqamning narxi auksion tugash vaqtiga qadar 965 million 250 ming so‘mga ko‘tarilgan.
Eslatib o‘tamiz, O‘zbekistonda 2023-yilda onlayn auksionlar orqali 87 mingdan ziyod avtoraqamlar sotilgandi. Sotilgan avtomobil raqamlarining jami qiymati 396,1 milliard so‘mni tashkil etgan. Eng qimmat “chiroyli” avtoraqam yuridik shaxsga 450 million so‘mga sotilgan.
2024-yilda 195 mingdan ziyod avtoraqamlar onlayn auksionlar orqali sotilgan.
Sotilgan avtoraqamlarning 97 foizi jismoniy shaxslar, 3 foizi yuridik shaxslar tomonidan xarid qilingan. Sotilgan avtoraqamlarning eng past bahosi 1,7 mln so‘mni, eng qimmat avtoraqamning qiymati esa 965,3 mln so‘mni tashkil qildi.
Izoh (0)