Самарқандда уйидан автомобилни олиб қочиб, “Сўнгги қўнғироқ” тадбирига кетаётган 8-синф мактаб ўқувчиси ЙПХ ходимларидан қочишга уринди. Бу ҳақда Йўл ҳаракати хавфсизлиги хизмати хабар берди.
Маълум қилинишича, вояга етмаган бола давлат рақам белгисини тушириб қолдириб йўлида давом этган. Ўқувчининг отасига нисбатан чора кўрилди.
Ҳолатни Самарқанд шаҳар 37-мактаб ўқувчиси содир этган.
Умуман олганда бугун, “Сўнгги қўнғироқ” куни соат 14:00 гача республика бўйлаб вояга етмаганлар томонидан автомобиль бошқариш билан боғлиқ 256 та ҳолат аниқланди.
Улар орасида 5-синф ўқувчиси ҳам мавжуд.
Шавкат Мирзиёев 15 май куни ўтказган видеоселектор йиғилишида вилоятларда, айниқса, Наманганда ўқувчиларга автомобилни ижарага бериш авж олгани оқибатида, ҳар ойда 10-15 нафар ёшлар мажруҳ бўлиб қолаётганини, ўлим билан тугаётган ҳолатлар ҳам кўплигини айтганди.
Шу муносабат билан болаларга машина бошқаришни берганлик учун жавобгарликни кучайтириш бўйича қонун лойиҳасини тайёрлаш топширилди.
Наманганда автомобилни вояга етмаганлар бошқариши оқибатидаги ЙТҲлар
2024 йилнинг апрель ойида Наманганда 11-синф ўқувчиси Lacetti’да икки талабани уриб юборганди. 2024 йилнинг ноябрида эса Наманган шаҳрида 9-синф ўқувчиси бошқарган Gentra автомобили иштирокида автоҳалокат содир бўлганди. 2025 йил апрелида Наманган вилоятининг Давлатобод тумани ҳайдовчилик гувоҳномасига эга бўлмаган мактаб ўқувчиси Nexia-3 машинасини бошқариб бориб, йўлнинг қарама-қарши томонига чиқиб кетган ва юк автомашинаси билан тўқнашганди. Наманган вилоятининг Учқўрғон туманида эса 10 синф ўқувчиси отасига тегишли Cobalt’да 4-синф ўқувчисини уриб юбориб, унинг ўлимига сабабчи бўлганди.
Наманган вилояти ЙҲХБ бошлиғи Мансур Газиев автомобилларни ижарага берувчи Telegram гуруҳ ва каналларининг аксарият аъзолари мактаб ўқувчиларидан иборатлигини айтганди.
Изоҳ (0)