UzAutoMotors Cobalt Midnight qimmat narxda sotilayotgani haqidagi xabarlarni rad etdi.
Avtostrada’da rasmiy narxi 155,2 million so‘m bo‘lgan Cobalt Midnight yangi savdo mexanizmi bo‘yicha ba’zi avtosalonlarda 167 million so‘mdan sotilayotgani, bu narx avtomobilni navbatsiz olish imkoniyatini taqdim etishi xabar qilingandi.
UzAutoMotors matbuot xizmatining “Daryo” so‘roviga ko‘ra ma’lum qilishicha, dilerlik markazlari avtomobillarga mustaqil ravishda narx belgilash huquqiga ega emas. Sotish faqat avtomobil ishlab chiqaruvchisi tomonidan belgilangan narxlarda amalga oshiriladi.
Kompaniya dilerlik tashkilotlari faoliyatini doimiy ravishda kuzatib boradi, chunki avtomobillarni belgilangandan yuqori narxda sotish taqiqlanadi va dilerlik shartnomasini buzish sifatida qaraladi. Bunday qonunbuzarliklar aniqlanganda tegishli choralar qo‘llanadi.
“Ayni paytda UzAutoMotors kompaniyasi Cobalt Midnight AT avtomobilini 167 million so‘mdan sotish holatlarini qayd etmagan”, deya ma’lum qildi kompaniya vakili.
Agar mijozning iltimosiga binoan avtomobilga qo‘shimcha qurilmalar yoki jihozlar o‘rnatilgan bo‘lsa (masalan, gaz balloni, chexol, masofaviy kalit va boshqalar), mijoz ushbu xizmatni dilerdan buyurtma qilishi, bu narx oshishiga sabab bo‘lishi mumkin.
Cobalt Midnight haqida
2024-yil oktabrida UzAutoMotors Chevrolet Cobalt avtomobilini yangi Midnight modifikatsiyasida ishlab chiqarilishini ma’lum qilgandi. Undan keyin Asakadagi zavodda yangi modifikatsiyadagi avtomobil ishlab chiqarila boshlandi. Yangi modifikatsiya tashqi ko‘rinishidagi detallari bilan ajralib turadi.
Izoh (0)