San’at asarlari, tarixiy yodgorliklar va boshqa buyumlar kim oshdi savdolarda juda katta summaga sotiladi. Janubiy Afrika rassomi asari 13,6 million dollarga sotilib, dunyodagi eng qimmat san’at asarlaridan biriga aylangani buning isbotidir. Agar savdoga qo‘yilgan buyum mashhur insonga tegishli bo‘lsa yoki tarixiy ahamiyatga ega bo‘lsa, uning narxi yanada ortadi. Quyida turli vaqtlarda rekord narxlarga sotilgan lotlarni to‘pladik.
1. “Dunyo xaloskori”, Leonardo da Vinchi
Narxi: 450,3 million dollar
2017-yilda bu rasmni Saudiya Arabistoni shahzodasi Badr bin Abdulloh Christie’s auksionida 450,3 million dollarga sotib oldi va uni san’at tarixidagi eng qimmat asarga aylantirdi. Mutaxassislar bu Leonardo da Vinchining asl ishi ekanini tasdiqlashgan, biroq u uzoq vaqt davomida yo‘qolgan asarning nusxasi deb hisoblangan.
2. “Lesters kodeksi”, Leonardo da Vinchi
Narxi: 30,8 million dollar
1506–1510-yillarda yozilgan qo‘lyozma to‘plamini Bill Geyts auksionda 30,8 million dollarga sotib olgan. So‘ng u kitobni keng jamoatchilikka taqdim etgan.
3. “Oz mamlakati sehrgari” filmidagi tufli
Narxi: 28 million dollar
2024-yilda Heritage Auctions savdo uyida “Oz mamlakati sehrgari” (1939) filmida aktrisa Judi Garlend kiygan yoqutrang tufli 28 million dollarga sotildi. Bu tuflining tarixi chindan ham ajoyib: 2005-yilda ular Minnesotadagi muzeydan o‘g‘irlangan. Natijada yo‘qolgan buyumni topish uchun FQB kuchlari jalb etilgan va 13 yildan so‘ng, maxsus operatsiya natijasida ularni qaytarishga erishilgan.
Qizig‘i, Dorotining ko‘k-oq katakli matodan tikilgan ko‘ylagi ham kino tarixidagi eng qimmat kiyimlardan biri bo‘lgan. 2015-yilda u 1,5 million dollarga sotilgan.
4. Elizabet Teylor taqinchog‘i
Narxi: 11,8 million dollar
Marhum aktrisa Elizabet Teylorga turmush o‘rtog‘i Richard Barton sovg‘a qilgan marjon Christie’s auksionida uning vafotidan keyin sotilgan. Zargarlik buyumi tabiiy marvarid, brilliant va yoqutlardan yasalgan.
5. Merilin Monro ko‘ylagi
Narxi: 4,8 million dollar
2016-yilda auksionda sotilgan bu ko‘ylak tarixdagi eng qimmatbaho liboslardan biriga aylangan. 2022-yilda Kim Kardashyan ushbu ko‘ylakni egasidan vaqtincha ijaraga olgan va Met Gala tadbirida kiygan. Bu holat katta shov-shuvga sabab bo‘lgandi.
Izoh (0)