AQSHda “Titanik” filmidagi eshikning bir parchasi Heritage Auctions kim oshdi savdosiga qo‘yildi, deb xabar bermoqda “Pravila jizni”. Uning boshlang‘ich narxi 40 ming dollar deb belgilangan, auksion esa 20—24-mart kunlari bo‘lib o‘tadi.
Ushbu eshik Titanik cho‘kkanidan so‘ng Jek (Leonardo Di Kaprio) va Rouz (Keyt Uinslet) ning suvdagi kadrlarida paydo bo‘ladi. Rouz singan eshik parchasi ustida jon saqlab qoladi. Jek esa uning xavfsizligini ta’minlash uchun o‘zini qurbon qiladi.
Heritage Auctions ta’kidlashicha, mazkur eshik bo‘lagi 1912-yildagi Titanik falokatidan qutqarilgan eng mashhur va haqiqiy rekvizit sanaladi. U Yangi Shotlandiyaning Galifaks dengiz muzeyida saqlanadigan Lyudovik XV uslubidagi dekorativ panelga juda o‘xshashdir.
Bundan tashqari, kim oshdi savdosida filmning so‘nggi sahnalarida suratga tushgan bosh qahramon libosi, qutqaruv g‘ildiragi va shturval sotuvga qo‘yilgan.
1997-yilda “Titanik” filmi namoyish etilganidan buyon ko‘pchilik tomoshabinlar Jek ham omon qolishi mumkin edi deb aytadi. Chunki eshik bo‘yi 2,5 metr, eni esa 1 metr bo‘lgan va unga ikki kishi bemalol sig‘a olardi, deb ta’kidlaydi muxlislar.
Biroq “Titanik” rejissyori Jeyms Kemeronning fikricha, Jekning o‘limi muqarrar edi: eshik ikki kishi vaznini ko‘tara olmay, cho‘kib ketar edi. Buning ustiga, Rouz hayotini xavf ostiga qo‘yish Jekning xarakteriga zid edi.
Rejissyor o‘z fikri haqiqat ekanligini isbotlash uchun kaskadyorlar yordamida xuddi bosh qahramonlar vaznidek insonlardan kinoning aynan eshik bilan bog‘liq sahnasini qayta yaratdi, shuningdek u sud-tibbiy ekspertlarga ham murojaat qildi.
Tajriba haqiqatdan ham eshikda ikki kishi jon saqlay olmasligi va cho‘kib ketishini tasdiqladi.
Izoh (0)