Germaniyalik mashhur dizayner Karl Otto Lagerfeldning studiya ko‘rinishidagi kvartirasi kimoshdi savdosiga qo‘yildi. Bu haqda “Pravila jizni” nashri xabar bermoqda. WWD qayd etishicha, marhum dizayner 2006-yildan to 2019-yilgacha — umrining so‘nggi kunlariga qadar mazkur uyda yashab kelgan.
Umumiy maydoni 260 kv/metr bo‘lgan xonadonning narxi 5,7 million dollarga baholanmoqda. Uy 1964-yilda qurilgan ko‘p qavatli binoning 4-qavatida joylashgan va kvartirada kuchli xavfsizlik tizimi o‘rnatilgan.
Xonadon minimalizm usulidagi dizaynga ega: yorqin rangdagi devorlar, ko‘plab chiroqlar va aylanadigan shisha kitob javonlari mavjud. Uy ilgari Lagerfeldning kitoblari va noyob mebellari bilan to‘la bo‘lgan. Xonadon derazasi Sena va Luvr muzeyiga qaragan.
Kimoshdi savdosi 26-mart kuni bo‘lib o‘tadi. Auksion tashkilotchisi Parij Savdo-sanoat palatasidir.
Karl Lagerfeld 2019-yil 19-fevralda 85 yoshida vafot etdi. U ko‘plab moda brendlari bilan ishlagan va yetakchi nashriyotlar bilan fotograf sifatida hamkorlik qilgan. 1984-yilda u Chanel va Fendi kreativ direktori bo‘lgan va keyinchalik o‘zining Karl Lagerfeld brendini ishga tushirgan edi.
Dizayner vafotidan so‘ng Sotheby’s auksion uyi Lagerfeldning shaxsiy buyumlari — mebel, interyer buyumlari va boshqalarni kim oshdi savdosiga qo‘ydi.
Izoh (0)