Toshkent shahrida 200 mingdan ortiq pulli to‘xtash joylarini tashkil etish rejalashtirilgan. Bu haqda poytaxt hokimligida bo‘lib o‘tgan uchrashuvda “Toshkent Invest” kompaniyasi raisining raqamli transformatsiya va axborot texnologiyalari bo‘yicha birinchi o‘rinbosari Aleksandr Gurko ma’lum qildi.
“Spot”ning yozishicha, birinchi bosqichda yo‘l bo‘yidagi to‘xtash joylari uchun 13−14 ming o‘ringa mo‘ljallangan 86 ta uchastkani foydalanishga topshirish rejalashtirilgan. Xususan, birinchi pulli avtoturargohlar sinov tariqasida mart oyida — ehtimol, Mirobod va Yakkasaroy tumanlarining ayrim ko‘chalarida ishga tushiriladi. 2025-yil iyulidan boshlab pulli avtoturargohlar ommaviy ravishda joriy etilishi kutilmoqda.
Gurko Toshkent shahar yagona parking axborot tizimini ishlab chiqish bo‘yicha tenderda g‘olib chiqqan Streetpark Systems kompaniyasi hozirda mobil ilova yaratish ustida ish olib borayotganini ta’kidladi. U orqali haydovchilar poytaxtdagi avtoturargohlar uchun to‘lovlarni amalga oshirishlari mumkin bo‘ladi.
Uning so‘zlariga ko‘ra, pulli avtoturargohlar to‘rtta tarif zonasiga bo‘lingan: soatiga 5, 8, 10 va 12 ming so‘m. Bunda, Iqtisodiyot va moliya vazirligi bilan kelishilgandan so‘ng eng yuqori tarif 30 ming so‘m etib belgilandi.
Pulli to‘xtash joylarini joriy etish orqali hokimlik tirbandliklarni kamaytirish va harakat tezligini oshirishni kutmoqda. Masalan, Said Baraka ko‘chasining bir qismida 250 ta avtoturargoh tashkil etilmoqda.
Natijada tartibga solingan avtoturargoh tirbandlikni 18 foizga kamaytirishi, o‘rtacha harakat tezligini 14 foizga oshirishi (37 km/soatdan 42 km/soatgacha) va kommunal xizmatlar uchun qulay sharoit yaratishi prognoz qilinmoqda. Xuddi shunday hisob-kitob To‘ytepa ko‘chasining 65 o‘rinli qismi uchun ham o‘tkazildi: tirbandliklar 20 foizga kamayadi, o‘rtacha harakat tezligi esa 15 foizga — soatiga 35 kilometrdan 40 kilometrgacha oshadi.
Avtoturargoh uchun to‘lovlarni nazorat qilish maxsus planshetlar va avtomobillar bilan joylarda tekshiruvchi videokuzatuv kameralari yordamida amalga oshiriladi. To‘lov qilmaganlik uchun ma’muriy javobgarlik faqat 2026-yildan boshlab joriy etilishi mumkin.
Aleksandr Gurko Toshkentda ko‘p qavatli avtoturargohlarni tashkil etish uchun joylar o‘rganilishini, ular odamlar gavjum nuqtalar, jumladan, bozorlar yaqinida qurilishini ham aytgan. Shuningdek, avtotransport yo‘llariga yaqin joyda joylashgan avtoturargohlarni tashkil etish imkoniyati o‘rganilmoqda. Bu ishlarni 3 oyda yakunlab, natijalari bo‘yicha taqdimot qilish rejalashtirilgan.
Toshkentda pulli to‘xtash joylari
Toshkentda avtomobillar uchun yo‘l bo‘ylarida pulli to‘xtash joylari tashkil etilishi haqida 2021-yilda ma’lum bo‘lgandi. 2024-yil 16-oktyabr kuni Shavkat Umurzoqov Toshkent shahrida transport vositalarining pulli to‘xtab turish faoliyatini yanada takomillashtirish chora-tadbirlari to‘g‘risidagi qarorni imzoladi. Hujjatda pulli to‘xtab turish joylaridan foydalanganlik uchun to‘lovlar miqdori ham tasdiqlandi.
Pulli to‘xtab turish joylarini tashkil etish huquqi uchun auksionda dastlab Balcomuz qo‘shma korxonasi g‘olib bo‘lgandi. Kompaniya 3 yil davomida avtoturargohlarni ijaraga olish uchun taxminan 120 milliard so‘m taklif qilgan, ammo kelishuv tasdiqlanmagan. 2024-yil 17-dekabr kuni takroriy auksion o‘tkazilib, boshlang‘ich narxdan 10 foizga yuqori narx (62,93 milliard so‘m) taklif etgan. Streetpark Systems kompaniyasi g‘olib bo‘ldi.
Izoh (0)