Ilon Maskning Twitter kompaniyasi yanvar oyida auksion o‘tkazadi, unda kompaniyaning San-Fransiskodagi ofisidan mingdan ortiq narsalar kimoshdi savdosiga qo‘yiladi. Bu haqda Teslarati xabar berdi.
Ma’lum qilinishicha, auksion 17-yanvar kechqurun 18-yanvar ertalabgacha davom etadi. Lotlar orasida qahva tayyorlovchi mashina, stollar, shuningdek, kompaniya ramzi bo‘lgan ko‘k qushning “statuetka”si bo‘ladi. Aksariyat mahsulotlar 25 dollardan, ba’zilari esa 50 dollardan boshlanadi. Yangi espresso mashinalari bir necha ming dollar turadi.
Twitter kompaniyasi nomidan kim oshdi savdosini Heritage Global Partners (HGP) kompaniyasi o‘tkazadi. Ularning aytishicha, auksionning kompaniya moliyaviy ahvoliga hech qanday aloqasi yo‘q.
“Kompaniya 44 milliard dollarga sotilgan va biz esa bir nechta stul, stol hamda kompyuterlarni sotamiz. Agar kimdir auksiondan tushgan daromad Twitter xaridi uchun sarflangan mablag‘ni to‘lashiga chin dildan ishonsa, xato qiladi”, — deydi HGP vakili Nik Dov.
Tadbirkor Ilon Mask tomonidan sotib olinganidan so‘ng, Twitter xarajatlarni kamaytirish uchun ofis ijarasini to‘lashni to‘xtatdi. Xususan, Twitter’ning San-Fransiskodagi (Kaliforniya shtati) bosh ofisi, shuningdek, kompaniyaning boshqa mamlakatlardagi vakolatxonalari joylashgan binolar uchun ijara haqi to‘lash to‘xtatilgan. Bundan tashqari, kompaniya ishdan bo‘shatilgan xodimlarga ishdan bo‘shatilish nafaqasini berishni ham to‘xtatmoqchi.
Izoh (0)