Bugun, 5-mart kuni Toshkent shahrida prezident Shavkat Mirziyoyev boshchiligida korrupsiyaga chek qo‘yishga oid yig‘ilish o‘tkazilmoqda. Majlisda davlat rahbari avvalgi favqulodda vaziyatlar vaziri Abdulla Qo‘ldoshevni ishdan olish sababini maʼlum qildi.
Prezident matbuot kotibi xabariga ko‘ra, vazir va uning o‘rinbosarlari lavozimidan ozod etilishi sohada qonun buzilish holatlari ko‘paygani bilan bog‘liq.
Qurilish sohasi eng korrupsiyalashgan sohalardan biri edi. “Shaffof qurilish” dasturi joriy etilganidan keyin bu yo‘nalishda ham ijobiy o‘zgarishlar sezilmoqda. Ilgari investitsiya dasturiga kirgan obyektlarni quradigan pudratchilar mingtaga ham yetmasdi. O‘tgan yili 13,5 mingta obyekt qurilishida 4 mingdan ziyod pudratchi ishtirok etdi. Soha raqamlashgani hisobiga o‘tgan 4-yilda 3,6 trillion so‘m byudjet mablag‘i tejaldi. Lekin qurilishga ruxsat berish, binoni topshirishda yong‘in xavfsizligi bo‘yicha byurokratiya va qonun buzilish ko‘payib ketgani uchun o‘tgan hafta favqulodda vaziyatlar vaziri va uning o‘rinbosarlari ishdan olindi”, deyiladi xabarda.
Shu bilan birga, yig‘ilishda aholiga yer berish jarayonida korrupsiya kamaygani maʼlum qilingan.
Tizimda inson omili va qog‘ozbozlikni kamaytirishga alohida eʼtibor qaratilmoqda. Masalan, aholiga yer berish jarayonida fuqarolar hokim va unga yaqin idoralar o‘rtasida sarson bo‘lib yurardi. Umuman, bu soha korrupsiya “o‘chog‘i”ga aylangan edi. Yerni hokim qarori bilan ajratishdan to‘liq voz kechilib, auksion tizimiga o‘tilgani natijasida bu tizim xalqchil bo‘ldi, deya qayd etgan manbada.
Eslatib o‘tamiz, joriy yil 25-fevral kuni Botir Qudratxo‘jayev yangi favqulodda vaziyatlar vaziri etib tayinlangan. Ungacha, 2022-yil mart oyidan beri Abdulla Qo‘ldoshev mazkur vazirlikni boshqarib kelgan.
Izoh (0)