O‘zbekistonda qishloq xo‘jaligiga mo‘ljallangan yerlarni qayta ijaraga berishga ruxsat etildi

O‘zbekistonda qishloq xo‘jaligiga mo‘ljallangan yer uchastkalari ijarachilariga ijaraga berilgan yer uchastkalari bo‘yicha o‘z huquq va majburiyatlarini boshqa shaxsga o‘tkazishga, ya’ni qayta ijaraga berishga ruxsat berildi.

Bu “Qishloq xo‘jaligida yerdan foydalanish samaradorligini oshirish va mahsulot yetishtirish hajmini ko‘paytirish bo‘yicha qo‘shimcha chora-tadbirlar to‘g‘risida”gi prezident qarorida belgilandi. Ushbu qaror kuchga kirgunga qadar ijaraga berilgan qishloq xo‘jaligi yerlari bo‘yicha ijara muddatiga teng taqsimlanadigan qo‘shimcha to‘lovlar yoki ijaraga olish huquqini bo‘lib-bo‘lib to‘lash bo‘yicha to‘lovlardan muddati o‘tgan qarzdorligi bo‘lgan ijarachilarga:

• yer uchastkasidan o‘zi foydalangan muddatdan qat’i nazar, tuman hokimi ishtirokida uch tomonlama shartnoma asosida yerga bo‘lgan huquqlari va majburiyatlarini, shu jumladan, qo‘shimcha to‘lovlar va bo‘lib-bo‘lib to‘lash bo‘yicha to‘lovlarni to‘lab borish bo‘yicha majburiyatini boshqa shaxsga o‘tkazish (qayta ijaraga berish) huquqi beriladi;
• agar ular dehqon xo‘jaligi yuritish uchun yer uchastkalarini olish bo‘yicha 2022-yil 1-yanvardan 2023-yil 15-aprelga qadar o‘tkazilgan ochiq elektron tanlovlarda g‘olib bo‘lgan “temir daftar”, “ayollar daftari”, “yoshlar daftari”ga kiritilgan fuqarolar va mehnat migrantlari bo‘lsa, ijara  muddatiga teng taqsimlanadigan qo‘shimcha to‘lovlar miqdori ushbu yer uchastkasi normativ qiymatining bir barobariga, boshqa shaxslar uchun esa to‘rt barobariga teng miqdorda belgilanadi.

Prezident qaroriga ko‘ra, sud hujjatlari va boshqa organlarning hujjatlarini ijro etishda undiruvchi qarzdorning qishloq xo‘jaligiga mo‘ljallangan yer uchastkasini uzoq muddatga ijaraga olish huquqiga qaratishda quyidagi soddalashtirilgan tartib joriy etiladi:

• undiruvni ijara huquqiga qaratish uchun tuman (shahar) hokimining — ijaraga beruvchining roziligi talab etilmaydi;
• ijara huquqini baholash talab etilmaydi, davlat ijrochisi vakolatli tashkilotlardan yer uchastkasining normativ qiymatini aniqlab, unga teng bo‘lgan boshlang‘ich narx miqdorini mulkiy huquqni xatlash dalolatnomasida ko‘rsatadi;
• elektron onlayn auksion savdolari narijalari to‘g‘risidagi bayonnoma yer ijarasi shartnomasi bo‘yicha huquqlar va majburiyatlar qolgan muddaqtga qarzdordan auksion g‘olibiga o‘tganini — qayta ijarani davlar ro‘yxatidan o‘tkazish uchun asos hisobalanadi.

Davlat rahbarining ushbu qarori bilan yuqori hosil olgan fermerlar endi uch karra kam yer solig‘i to‘laydi.