E-auksion platformasida poytaxtning Mirobod tumanidagi “Beshqo‘rg‘on” dehqon bozori filialining, xalq tilida “Risoviy bozor” bino va inshootlari sotuvga qo‘yildi.
Savdo kompleksi Davlat aktivlarini boshqarish agentligi Toshkent shahar hududiy boshqarmasi tomonidan Vazirlar Mahkamasining 2024-yil 10-iyuldagi 411-son qarori asosida sotuvga qo‘yilgan.
Farg‘ona yo‘li va Abdurauf Fitrat ko‘chalari kesishmasida joylashgan lotning boshlang‘ich narxi 15,9 milliard so‘mni tashkil etadi.
Xaridor obyekt negizida loyiha tashkiloti tomonidan ishlab chiqilgan loyiha master reja asosida “ekobozor”, savdo, ofis, xizmat ko‘rsatish va ko‘ngilochar markazlarni hamda avtoturargohni qurishi kerak. Binoning umumiy maydoni 0,26 gektarga teng.
Arizalar 28-aprel kuni soat 9:00 gacha qabul qilinadi va natijalar o‘sha kuni soat 10:00 da e’lon qilinadi.
O‘tgan yilning oktyabr oyida Toshkentdagi “Ibn Sino” bozori binosi sotuvga qo‘yilgandi, biroq sotilmagandi.
Noyabr oyida esa “Askiya” bozori mulki va hududi 16,8 mln dollar narxda auksionga qo‘yilgandi. Ikki qatnashchi ishtirokidagi auksion 15 daqiqa davom etdi va 225,59 mlrd so‘mlik bitta stavkadan so‘ng yakunlanib, Xitoyning Sheng Ke-International kompaniyasiga sotilgandi.
Izoh (0)