Nobel qo‘mitasi iqtisodiyot bo‘yicha mukofot sovrindori bilan bog‘lana olmadi. Shu sababli uni yarim tunda mukofotning boshqa sohibi uyiga kelib uyg‘otishga majbur bo‘ldi (video)

12-oktabr kuni Stokgolmda iqtisodiyot bo‘yicha Nobel mukofoti sovrindorlari nomi e’lon qilingani to‘g‘risida xabar berilgandi. Meduza’ning yozishicha, mukofot tashkilotchilari sovrindorlardan biri bilan bog‘lana olmay, uning hamkasbidan yordam so‘ragan.

Nobel qo‘mitasi Stenford universitetidan bo‘lgan Pol Milgromga u o‘zining hamkasbi va qo‘shnisi Robert Uilson bilan birgalikda iqtisodiyot bo‘yicha mukofotni qo‘lga kiritganini ma’lum qilish uchun bog‘lana olmagan. Shundan so‘ng Uilson rafiqasi bilan birgalikda yarim tunda Milgromning uyiga borib, hamkasbi uyg‘onguniga qadar eshikni taqillatib turgan.

https://twitter.com/Stanford/status/1315631500080148480

Uilson vaziyatni tushuntirgan: “Pol! Men Bob Uilsonman. Sen Nobel mukofotini olding. Sen bilan bog‘lanishga urinishdi, biroq bundan hech nima chiqmagan. Qo‘mitada raqaming yo‘q ekan”. Uilson rafiqasi bilan mukofot tashkilotchilariga Milgromning mobil telefoni raqamini bergan va iqtisodchidan qo‘mitaning qo‘ng‘iroqlariga javob berishni so‘ragan.

Amerikalik Pol Milgrom va Robert Uilson mukofotga kim oshdi savdosi nazariyasini takomillashtirgani va yangi auksion formatlarini ixtiro qilgani uchun loyiq ko‘rilgan.

Ma’lumot uchun, 2020-yilda Nobel mukofotiga sazovor bo‘lganlar: Jahon oziq-ovqat dasturi (tinchlik mukofoti), shoira Luiza Glyuk (adabiyot bo‘yicha), Emmanuel Sharpantye va Jennifer Dudne (kimyo bo‘yicha), Harvi Olter, Maykl Xauton va Charlz Raysg (tibbiyot va fiziologiya bo‘yicha), Rojer Penrous, Andrea Gez va Reynxard Genzel (fizika bo‘yicha).

Eslatib o‘tamiz, 2020-yilda Nobel mukofoti miqdori oshirilgan bo‘lib, 10 million shved kronasi (taxminan 1,1 million dollar)ni tashkil etadi.