Санъат асарлари, тарихий ёдгорликлар ва бошқа буюмлар ким ошди савдоларда жуда катта суммага сотилади. Жанубий Африка рассоми асари 13,6 миллион долларга сотилиб, дунёдаги энг қиммат санъат асарларидан бирига айлангани бунинг исботидир. Агар савдога қўйилган буюм машҳур инсонга тегишли бўлса ёки тарихий аҳамиятга эга бўлса, унинг нархи янада ортади. Қуйида турли вақтларда рекорд нархларга сотилган лотларни тўпладик.
1. “Дунё халоскори”, Леонардо да Винчи
Нархи: 450,3 миллион доллар
2017 йилда бу расмни Саудия Арабистони шаҳзодаси Бадр бин Абдуллоҳ Christie’s аукционида 450,3 миллион долларга сотиб олди ва уни санъат тарихидаги энг қиммат асарга айлантирди. Мутахассислар бу Леонардо да Винчининг асл иши эканини тасдиқлашган, бироқ у узоқ вақт давомида йўқолган асарнинг нусхаси деб ҳисобланган.
2. “Лестерс кодекси”, Леонардо да Винчи
Нархи: 30,8 миллион доллар
1506–1510 йилларда ёзилган қўлёзма тўпламини Билл Гейтс аукционда 30,8 миллион долларга сотиб олган. Сўнг у китобни кенг жамоатчиликка тақдим этган.
3. “Оз мамлакати сеҳргари” фильмидаги туфли
Нархи: 28 миллион доллар
2024 йилда Heritage Auctions савдо уйида “Оз мамлакати сеҳргари” (1939) фильмида актриса Жуди Гарленд кийган ёқутранг туфли 28 миллион долларга сотилди. Бу туфлининг тарихи чиндан ҳам ажойиб: 2005 йилда улар Миннесотадаги музейдан ўғирланган. Натижада йўқолган буюмни топиш учун ФҚБ кучлари жалб этилган ва 13 йилдан сўнг, махсус операция натижасида уларни қайтаришга эришилган.
Қизиғи, Доротининг кўк-оқ катакли матодан тикилган кўйлаги ҳам кино тарихидаги энг қиммат кийимлардан бири бўлган. 2015 йилда у 1,5 миллион долларга сотилган.
4. Элизабет Тейлор тақинчоғи
Нархи: 11,8 миллион доллар
Марҳум актриса Элизабет Тейлорга турмуш ўртоғи Ричард Бартон совға қилган маржон Christie’s аукционида унинг вафотидан кейин сотилган. Заргарлик буюми табиий марварид, бриллиант ва ёқутлардан ясалган.
5. Мерилин Монро кўйлаги
Нархи: 4,8 миллион доллар
2016 йилда аукционда сотилган бу кўйлак тарихдаги энг қимматбаҳо либослардан бирига айланган. 2022 йилда Ким Кардашьян ушбу кўйлакни эгасидан вақтинча ижарага олган ва Меt Gala тадбирида кийган. Бу ҳолат катта шов-шувга сабаб бўлганди.
Изоҳ (0)