Joriy yil 18-mart kuni Jizzax viloyati hokimi Ulug‘bek Mustafoyev 662,7 million so‘mga Chevrolet Traverse avtomobilini xarid qilish bo‘yicha farmoyish imzolagan.
Hujjatda yozilishicha, avtomashina mahalliy byudjetning zaxira jamg‘armasi mablag‘lari hisobidan xizmatda foydalanish maqsadida sotib olinadi.
Farmoyishda avtomobil 2025-yil 5-mart kungi korrupsiyaga qarshi kurashishga oid yig‘ilishda prezidentning davlat amaldorlariga O‘zbekistonda ishlab chiqarilgan avtomobillardan foydalanish topshirig‘i asosida xarid qilinishi qayd etilgan.
Shu bilan birga, Ulug‘bek Mustafoyev “O‘zavtosanoat” AJdan xizmat transporti sifatida foydalanish uchun Chevrolet Tahoe avtomobili ajratilishini so‘ragan. Hokim so‘rovida mashina to‘lovlari kafolatlanishini maʼlum qilingan. Mazkur so‘rov mazmunida ham davlat rahbarining yig‘ilishdagi topshirig‘iga urg‘u berilgan. Mamlakatda Tahoe avtomobili narxi 1,1 milliard so‘mdan boshlanadi.
Jizzax viloyati mamlakatda eng kam aholi yashaydigan uch hududdan biri hisoblanadi. Viloyat byudjetining daromadlari ham aksar hududlardagiga nisbatan kamroq.
2024-yilda Jizzax viloyati byudjetiga 2,15 trillion so‘m daromad kelgan bo‘lsa, 3,84 trillion so‘m xarajat qilingan. O‘rtada qariyb 1,7 trillion so‘m zarar ko‘rilgan. Taqchillikning 900 milliard so‘mi respublika byudjetidan qoplab berilgan. Respublika byudjeti taqchilligini yopish uchun esa xorijdan o‘tgan yili olingan 7,3 milliard dollar qarzning 3,2 milliardi sarflangan.
“Davlat byudjeti to‘g‘risida”gi qonundagi prognozlarga ko‘ra, Jizzax viloyatining 2025-yildagi daromadlari 2,5 trillion so‘mni, xarajatlari 3,6 trillion so‘mni tashkil etadi. Bunda ham viloyat yilni 1,1 trillion so‘m zarar bilan yopishi kutilmoqda. Mazkur taqchillik respublika byudjetidan qoplanadi. Respublika byudjeti defitsitini yopish uchun esa yana davlat qarzi jalb qilinadi.
Prezident boshchiligidagi yig‘ilishdan keyin bosh vazir Abdulla Oripov Mercedes-Benz xizmat avtomobilini Malibu’ga almashtirdi. Shundan so‘ng vazirlar va hokimlar uchun yoppasiga Uzauto Motors avtomobillari sotib olina boshlandi. Xarid qilinganda ham eng qimmat modellarga pul sarflanmoqda.
Bosh vazir matbuot kotibining “Daryo”ga maʼlum qilishicha, hozirda hukumat tarkibidagi barcha vazirliklar, idoralar, Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari xizmat avtomobili sifatida mahalliy avtotransportlardan foydalanishga o‘tgan. Shu kungacha foydalanib kelingan “inomarka”lar esa bosqichma-bosqich “E-auksion” elektron savdo platformasi orqali sotuvga chiqariladi.
Iqtisodchi Bahodir G‘aniyev fikricha, ko‘plab amaldorlarning xorijda ishlab chiqarilgan xizmat mashinalari eskirgan. Shu sabab, yangi sotib olinayotgan mashinalar sotiladigan “inomarka”lardan qimmatga tushadi.
“Asosan vazirlar, hokimlar, Vazirlar Mahkamasi va Prezident administratsiyasi rahbarlari “inomarka”da yuradi. Ularning mashinalari kamida 10-15 yil oldin xarid qilingan Mercedes’lar. Bunday avtomobillarni auksionga qo‘ysangiz, narxi yangi Malibu’ning puliga ham yetmasligi mumkin. Shu yo‘sinda bizlar byudjet pulini iqtisod qilyapmizmi yoki talon-toroj?
Eski “inomarka”larni Malibu’dan arzon sotib, yangi Malibu sotib olishyapti. Viloyat hokimlari Tahoe’da yurarmish. U avtomobil esa Mercedes-Benz narxida sotiladi. Bu avtomobillarning nimasi mahalliy ishlab chiqariladi? Mahalliy ishlab chiqariladigan mashinalar desa, mana Gentra, Cobalt’ga o‘tsin. Shunda mablag‘lar haqiqatan iqtisod bo‘ladi. Vazirlar, hokimlar ichida men ertadan Cobalt’da yuraman deydigan mardi bormi”, deya fikr bildirgan iqtisodchi.
O‘rganishlarga ko‘ra, vazirlarning ko‘pchiligi xizmat mashinasi sifatida Malibu avtomobilidan foydalanishga o‘tmoqda.
Izoh (0)