O‘zbekiston elchixonasi Hindistonga aldov yo‘li bilan olib kelingan va odam savdosi qurboniga aylanish xavfi ostida qolgan ayolga vatanga qaytishiga yordam ko‘rsatdi, deb xabar qilmoqda “Dunyo” axborot agentligi.
Qayd etilishicha, diplomatik missiya konsullik bo‘limiga Hindiston huquq-tartibot idoralaridan Dehlidagi Indira Gandi xalqaro aeroportida ruhiy tushkunlik holatidagi Z.T. ismli O‘zbekiston fuqarosi aniqlangani haqida ma’lumot kelib tushgan.
Shundan so‘ng zudlik bilan ushbu ayol bilan aloqa o‘rnatilib, u elchixonaga olib kelingan. Surishtiruv jarayonida aniqlanishicha, Z.T.ga S. va K. ismli kimsalar tomonidan Dehli shahridagi oshxonalardan birida ofitsiant bo‘lib ishlash taklifi bildirilgan. Biroq Hindistonga kelib, mehmonxonaga joylashgach, Z.T. aldov tuzog‘iga tushib qolganini bilib qolgan hamda uni vatanga qaytarib yuborishlarini talab qilgan. Biroq S. va K. Z.T.dan uning uchun sarflangan yo‘l xarajatlarini qoplab berishini talab qilgan hamda jinsiy xizmat ko‘rsatishga majburlashga harakat qilgan.
Z.T. o‘zi ushlab turilgan maskandan qochish va mahalliy politsiya vakillariga murojaat qilishga erishgan.
O‘zbekiston elchixonasi tomonidan og‘ir ahvolga tushib qolgan fuqaroga tezkor konsullik-huquqiy yordami ko‘rsatilgan hamda homiy tashkilotlar ko‘magida Dehli—Toshkent yo‘nalishidagi aviareysga chipta sotib olingan.
Ayni paytda O‘zbekiston fuqarosini yolg‘on va’dalar bilan Dehliga olib kelib, ekspluatatsiya qilishga urinishda gumon qilinayotgan kimsalarga nisbatan qonuniy chora ko‘rilishi bo‘yicha Hindistonning tegishli muassasalari bilan hamkorlik qilinmoqda.
Diplomatik missiya fuqarolarni Hindistonga safar qilishdan oldin turli shubhali guruh yoki shaxslarning yolg‘on va’dalariga aldanib qolmaslik, ushbu mamlakatga kirish va unda bo‘lib turish chog‘ida mahalliy qonunchilik talablariga qat’iy rioya qilishga chaqirdi.
2025-yilning mart oyida Toshkent viloyatida 5 nafar ayolni shahvoniy maqsadda O‘zbekistondan olib chiqmoqchi bo‘lgan shaxslar ushlangandi. Aprelda Myanmada odam savdosi qurboni bo‘lgan ikki nafar O‘zbekiston fuqarosi vatanga qaytarilgandi.
Izoh (0)