21 май куни Ҳиндистон пойтахтига ёғган кучли жала ва йирик дўл оқибатида беш киши ҳалок бўлди. Бу ҳақда полиция маълумотларига асосланиб Тhе Times of India агентлиги хабар берди.
Табиий офат натижасида 22 ёшли йигит, ногиронлиги бор шахс ва яна уч киши вафот этган. Тўсатдан ёғган жала билан боғлиқ ҳодисалар туфайли камида 11 киши тан жароҳати олган.
Кучли дўл ва шиддатли шамол бутун шаҳарга зарар етказиб, транспорт ҳаракатини издан чиқарган, кўплаб дарахтларни илдизи билан қўпориб ташлаган. Ижтимоий тармоқлар ҳаракатланаётган транспорт воситалари устига дарахтлар қулаб тушаётганини акс эттирувчи видео ва суратлар билан тўлиб-тошди. Кучли ёмғир ва момақалдироқ сабабли Деҳли аэропортига камида 13 та рейс йўналишини ўзгартирган.
Шаҳарнинг кўплаб ҳудудларида электр таъминоти узилган, чунки момақалдироқ ва дўл электр энергияси инфратузилмасига шикаст етказган. Қулаб тушган дарахтлар ва шохлар электр узатиш линияларини шикастлаган, бу эса шаҳарнинг бир қанча қисмларида электр таъминотининг узилишига олиб келган.
Аэропортида фаолият юритувчи авиакомпаниялар йўловчиларни рейсларнинг кечикиши ва жадвалидаги ўзгаришлар ҳақида олдиндан огоҳлантирган эди. Бўрон пайтида самолётда бўлган йўловчилардан бири кучли турбулентлик ҳақида сўзлаб берган. Унинг таъкидлашича, лайнер фюзеляжнинг олд қисми шикастланганига қарамай, учувчининг маҳорати туфайли қўнишга эришган.
Ҳиндистон метеорология департаменти маълумотларига кўра, бўрон пайтида шамол тезлиги соатига 79 километргача етган. Етилган гилос мевасидек катталикдаги дўл маҳаллий аҳоли учун кутилмаган ҳодиса бўлди. Бундай об-ҳаво ҳодисаси Ҳиндистон пойтахтида жуда камдан-кам кузатилади, чунки у ерда май ойида кундузи ҳаво ҳарорати одатда 40 даражадан ошади.
Австралиянинг жануби-шарқида ёғган ёмғир қисқа муддатли тошқинларни келтириб чиқарган, кўплаб шаҳарларни ташқи дунёдан узиб қўйган ва аҳоли уй томларида жон сақлаётгани хабар қилинганди.
Изоҳ (0)