Yevropa Ittifoqiga a’zo davlatlar Suriyaga nisbatan joriy etilgan iqtisodiy sanksiyalarni bekor qilishga qaror qildi. Bu haqda Yevropa Ittifoqi kengashining Bryusseldagi yig‘ilishi yakunlari bo‘yicha hamjamiyat tashqi ishlar vazirligi rahbari Kaya Kallas X ijtimoiy tarmog‘ida ma’lum qildi.
“Bugun biz Suriyadan iqtisodiy sanksiyalarimizni olib tashlashga qaror qildik. Suriya xalqiga yangi, barcha qatlamlarni qamrab oluvchi va tinch Suriyani tiklashda yordam bermoqchimiz”, deya yozdi u.
Kallasning aytishicha, YI so‘nggi 14 yil davomida suriyliklarga doimo ko‘maklashib kelgan va bundan keyin ham shunday davom etadi.
Yevropa Ittifoqi 2012-yildan beri Suriyaga qarshi asosan Suriya hukumati va harbiy tuzilmalariga yo‘naltirilgan iqtisodiy sanksiyalarni joriy etgan edi. Choralar neft embargosi, ayrim investitsiyalarga cheklovlar, Suriya Markaziy bankining Yevropa Ittifoqidagi mablag‘larini muzlatish hamda qatag‘on uchun ishlatilishi mumkin bo‘lgan uskunalar va texnologiyalarga eksport cheklovlarini o‘z ichiga olgan.
27-yanvar kuni Yevropa Ittifoqi mamlakatlarining tashqi ishlar vazirlari Suriyaga qarshi sanksiyalarni bosqichma-bosqich yumshatish rejasini kelishib oldilar. Kaya Kallas ta’kidlaganidek, agar Suriyaning yangi hokimiyati “noto‘g‘ri qadamlar” qo‘ysa, qaror qayta ko‘rib chiqilishi mumkin.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televideniyedagi murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)