Yevropa ittifoqi mamlakatlari tashqi ishlar vazirlari Bryusseldagi yig‘ilishda Suriyaga qarshi so‘nggi bir necha yil davomida amalda bo‘lgan sanksiyalarni bosqichma-bosqich yumshatish rejasini kelishib oldi.
Germaniya, Fransiya, Ispaniya, Niderlandiya, Daniya, Finlyandiya Suriyada hokimiyat almashishi munosabati bilan cheklovlarni qisman olib tashlash tarafdori bo‘ldilar.
Yevropa ittifoqi diplomatlari blokning Suriyaga nisbatan sanksiyalarini yumshatish bo‘yicha yo‘l xaritasini kelishib oldilar, deb yozdi Yevropa diplomatiyasi rahbari Kaya Kallas X ijtimoiy tarmog‘ida.
Euronews’ning yozishicha, Yevropa Ittifoqi TIV rahbarlarining uchrashuvidan oldin Yevrokengash Suriya bo‘yicha muzokaralar uchun hujjat tayyorlagan, unda fuqarolik parvozlarini soddalashtirish uchun aviakompaniyalar, jumladan, Syrian Arab Airlines’ga nisbatan sanksiyalarni olib tashlash, shuningdek, neft-gaz texnologiyalarini eksport qilish taqiqini qayta ko‘rib chiqish taklif etilgan.
Shu bilan birga, Bashar Asad va uning tarafdorlariga qarshi sanksiyalar o‘z kuchida qoladi. Hokimiyat tepasiga kelgan “Hay’at Tahrir ash-Shom”ni terrorchi tashkilotlar ro‘yxatidan chiqarish masalasi BMT Xavfsizlik kengashi darajasida hal qilinishi kutilmoqda.
Yevropa ittifoqi Suriya hukumati va harbiy tuzilmalariga qaratilgan iqtisodiy sanksiyalarni 2012-yilda joriy etgan. Cheklovlar neft embargosi, ba’zi investitsiyalarni cheklash, Suriya Markaziy bankining Yevroittifoqdagi aktivlarini muzlatish va qatag‘on uchun ishlatilishi mumkin bo‘lgan asbob-uskunalar va texnologiyalarga eksport cheklovlarni o‘z ichiga olgan.
Yevropa ittifoqi avvalroq Damashqdan Yevropa sanksiyalarini olib tashlash va mamlakatdagi mojaroni hal qilish uchun xorij kuchlari, shu jumladan Rossiyaning
harbiy bazalaridan xalos bo‘lishni so‘ragan edi.
Ha, albatta, bu biz kuzatayotgan masala. Biz yangi hukumatga Suriyadagi normallashtirishning bir qismi har qanday xorijiy ishtirokdan — harbiy ishtirok yoki aralashuvdan xalos bo‘lishni o‘z ichiga olishi kerakligini ma’lum qildik. U yerda uchta davlat bor, ulardan biri — Rossiya, dedi Yevropa ittifoqi vakili jurnalistlarga.
Izoh (0)