Germaniya tashqi ishlar vaziri Annalena Berbok va Fransiyaning Yevropa va tashqi ishlar vaziri Jan-Noel Barro Bashar Asad hokimiyatdan ag‘darilganidan keyin Suriyaga tashrif buyurgan birinchi Yevropa ittifoqi tashqi ishlar vazirlari bo‘ldi.
Yevropa ittifoqi diplomatiyasi rahbari Kaya Kallasning maʼlum qilishicha, Barro va Berbok ushbu tashrifda uning topshirig‘iga binoan Yevropa ittifoqini Suriya rasmiylariga tanishtiradi.
“Suriyaning yangi rahbariyatiga mintaqaviy o‘yinchilar bilan kelishilgan tamoyillarga rioya qilish va barcha tinch aholi va ozchiliklar himoyasini taʼminlash juda muhim ekanini ma’lum qilamiz, dedi Yevropa diplomatiyasi rahbari.
Fransiya va Germaniya diplomatiyasi rahbarlari bilan muzokaralarni “Hay’at Tahrir ash-Shom” rahbari Ahmad al-Shara (Abu Muhammad al-Juloniy) olib bordi. Nemis jurnalisti Andreas Kunast Suriyaning de-fakto rahbari Berbokning qo‘lini siqmagani, chunki u “odatda ayollar bilan qo‘l berib ko‘rishmasligi”ni, biroq uning salomlashuvini do‘stona deb hisoblash mumkinligini ta’kidladi.
Barrotning yozishicha, Fransiya va Germaniya “suriyaliklar va mintaqaviy barqarorlikka foyda keltiradigan hokimiyatning tinch yo‘l bilan almashinishiga yordam berish” niyatida.
Berbok, o‘z navbatida, Berlin Suriyaning yangi hukumatidan ayollar va erkaklar, shuningdek, mamlakatdagi barcha etnik va diniy guruhlar uchun teng huquqlarni ta’minlashini kutishini aytdi.
Biz “Hay’at Tahrir ash-Shom”ning mafkuraviy jihatdan qayerdan kelganini va u o‘tmishda nima qilganini bilamiz. Ammo barcha shubhalarga qaramay, Suriya xalqini ushbu muhim tarixiy chorrahada qo‘llab-quvvatlash imkoniyatini qo‘ldan boy bermasligimiz kerak, deya qo‘shimcha qildi vazir.
Berbok, shuningdek, Suriyadagi Rossiya harbiy bazalarini yopishga chaqirdi. U Asad davrida mahbuslar qiynoqqa solingan va qatl etilgan Sednaya qamoqxonasiga ham tashrif buyurdi. “Bild” nashrining yozishicha, qamoqxonadagi hid tufayli tashrif buyuruvchilar niqob kiyishga majbur bo‘lgan.
Izoh (0)