Yevropa Ittifoqining diplomatik bo‘limi xorijdagi 10 ta vakolatxonasi faoliyatini qisqartirishga, 100 ga yaqin mahalliy xodimni ishdan bo‘shatishga tayyorgarlik ko‘rmoqda. Bu haqda Politico xabar berdi.
Bu byudjet mablag‘larining qisqarishi va keng miqyosli tashkiliy o‘zgarishlar doirasida qabul qilinadi. Shu bilan birga Rossiyaga qarshi sanksiyalarga rioya qilishga yordam beradigan mamlakatlarda delegatsiyalar kuchaytiriladi. Yevropa Ittifoqining diplomatiyasi rahbari Kaya Kallas 14-may kuni Yevropa tashqi harakatlar xizmatini qisqartirish rejasini taqdim etdi.
2026 va 2027-yillarga mo‘ljallangan rejaga ko‘ra, 144 ta vakolatxonaning 10 tasidagi xodimlar soni qisqartiriladi. Faqat elchi va bir-ikki yordamchi qolishi rejalashtirilmoqda. Jami 100 ga yaqin mahalliy xodim ishdan bo‘shatilishi mumkin.
Xorijiy delegatsiyalarning hech biri yopilmaydi, ammo qolgan xodimlar masofadan ishlashga o‘tadi, bu esa, vakolatxonalarni yopish bilan barobar, deydi Politico suhbatdoshlari.
Yevropa Ittifoqi ilgari rivojlanishga yordam berishga intilgan mamlakatlarda, masalan, Belarus yoki Lesotoda vakolatxonalar qisqartiriladi. Ushbu o‘zgarishlar doirasida Yevropa Ittifoqining ayrim xorijiy vakolatxonalari ko‘proq xodimlarga ega bo‘ladi. Yevropa Ittifoqi mudofaa bo‘yicha hamkor bo‘lgan mamlakatlarda o‘z vakolatlarini kuchaytirishga intilmoqda.
Rasmiylardan birining aytishicha, yuqoridagi islohot birinchi yilda Yevroittifoqiga 20 million yevroga tushadi, keyingi uch yil davomida esa har yili 9 million yevrogacha tejashga sabab bo‘ladi.
2011-yilda tashkil etilgan Yevropa Tashqi harakatlar xizmati (EEAS) dastlab rivojlanish uchun yordam va iqtisodiy hamkorlikka yo‘naltirilgan bo‘lib, o‘sha paytda faqat bir necha o‘nlab xodimga ega edi. Keyinchalik Yevroittifoq o‘z global ta’sirini kengaytirish maqsadida xizmatni butun dunyo bo‘ylab 5 200 dan ortiq xodim bilan kengaytirdi. Delegatsiyalar mahalliy hukumatlar bilan aloqalarni o‘rnatish, Yevroittifoq mablag‘lari va grantlarini taqsimlash, shuningdek, ba’zida mojaroli hududlardagi vaziyatlar haqida hisobot berish kabi vazifalarni bajaradi.
Izoh (0)