Европа Иттифоқига аъзо давлатлар Сурияга нисбатан жорий этилган иқтисодий санкцияларни бекор қилишга қарор қилди. Бу ҳақда Европа Иттифоқи кенгашининг Брюсселдаги йиғилиши якунлари бўйича ҳамжамият ташқи ишлар вазирлиги раҳбари Кая Каллас Х ижтимоий тармоғида маълум қилди.
“Бугун биз Суриядан иқтисодий санкцияларимизни олиб ташлашга қарор қилдик. Сурия халқига янги, барча қатламларни қамраб олувчи ва тинч Сурияни тиклашда ёрдам бермоқчимиз”, дея ёзди у.
Калласнинг айтишича, ЕИ сўнгги 14 йил давомида сурийликларга доимо кўмаклашиб келган ва бундан кейин ҳам шундай давом этади.
Европа Иттифоқи 2012 йилдан бери Сурияга қарши асосан Сурия ҳукумати ва ҳарбий тузилмаларига йўналтирилган иқтисодий санкцияларни жорий этган эди. Чоралар нефть эмбаргоси, айрим инвестицияларга чекловлар, Сурия Марказий банкининг Европа Иттифоқидаги маблағларини музлатиш ҳамда қатағон учун ишлатилиши мумкин бўлган ускуналар ва технологияларга экспорт чекловларини ўз ичига олган.
27 январь куни Европа Иттифоқи мамлакатларининг ташқи ишлар вазирлари Сурияга қарши санкцияларни босқичма-босқич юмшатиш режасини келишиб олдилар. Кая Каллас таъкидлаганидек, агар Суриянинг янги ҳокимияти “нотўғри қадамлар” қўйса, қарор қайта кўриб чиқилиши мумкин.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этди.
Россия Ташқи ишлар вазирлиги Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Исёнчилар Асадни қўлга олишда ёрдам берадиган маълумот учун 10 миллион доллар ваъда қилган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-торож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Кечроқ Кремлдаги манбалар Суриядан қочган президент оиласи билан Москвага келгани, Путин уларга бошпана берганини маълум қилди. 10 декабрь куни Идлиб шаҳрида исёнчиларга раҳбарлик қилган Муҳаммад ал-Башир ўзини Суриянинг ўтиш даври ҳукумати раҳбари этиб тайинлади. У фуқароларга қарата қилган телевидениедаги мурожаатида бу лавозимни камида 2025 йил 1 мартгача эгаллаб туришини маълум қилди.
Изоҳ (0)