Yevropa komissiyasi kambag‘al mamlakatlarga beriladigan xorijiy yordamdan ko‘proq foyda olishni va Yevropa ustuvorliklariga mos keladigan bir qator shartlarni qo‘shishni istaydi. Bu haqda ichki hujjatga asoslanib Politico xabar berdi.
“YK Bryusselda ishlab chiqilayotgan ziddiyatli reja doirasida kambag‘al mamlakatlarga taklif qiladigan xorijiy yordamdan ko‘proq foyda olishni xohlaydi... Shu sababli YK xorijiy yordam va energetika hamda migratsiya kabi ichki ustuvorliklar o‘rtasidagi aloqani kuchaytirmoqchi”, deb yozadi nashr.
Ta’kidlanishicha, YK rivojlanayotgan mamlakatlarga o‘tkaziladigan mablag‘larga, masalan, migratsiya oqimini to‘xtatish zarurati kabi shartlarni qo‘shish niyatida. Rejaning asosiy g‘oyasi Afrika yoki Yaqin Sharq kabi mintaqalarga nafaqat qashshoqlikka qarshi kurashish, balki Yevropa Ittifoqi mamlakatlarining ichki ustuvorliklarini amalga oshirish uchun mablag‘ yo‘naltirishdan iborat.
“Ushbu hamkorlik paketlari tashqi harakatlar, energiya xavfsizligi va muhim xomashyo yetkazib berish kabi ichki ustuvorliklar o‘rtasidagi aloqani mustahkamlaydi”, deya iqtibos keltirmoqda nashr YK rahbari Ursula fon der Lyayenning byudjet bo‘yicha komissar Pyotr Serafinga yo‘llagan ichki maktubidan.
Nashrning ta’kidlashicha, yangi rejalarning potensial joriy etilishi Yevropa Ittifoqining rivojlanish kun tartibini AQSH va Buyuk Britaniya kun tartibiga o‘xshatib qo‘yadi. Bu davlatlar ichki saylovchilar ustuvorliklariga erishish uchun xorijiy yordamdan foydalanadi. Shu bilan birga, maqolada qayd etilishicha, to‘lovlarga qo‘shimcha shartlarni qo‘shish uchun Yevropa Ittifoqi asosiy qonun chiqaruvchilarni, turli nodavlat notijorat tashkilotlari va a’zo mamlakatlarni yangi qoidalarni bir ovozdan ma’qullashga ishontirishi kerak, ammo bu oson bo‘lmasligi mumkin.
“Hech bir a’zo davlat bunday yondashuvni qo‘llab-quvvatlamaydi”, dedi Yevropa Ittifoqining nomi oshkor etilmagan diplomati.
Shuningdek, yangi model jiddiy ma’muriy o‘zgarishlarga olib kelishi qayd etilgan.
Ko‘rib chiqilayotgan reja doirasida YK har bir benefitsiar davlat bilan iqtisodiy hamkorlikni ishlab chiqadi, yordamni kengroq savdo va iqtisodiy aloqalar bilan bog‘laydi. Shuningdek, yangi model jiddiy ma’muriy o‘zgarishlarga olib kelishi qayd etilgan. Masalan, strategiya migratsiya va xorijiy investitsiyalardan tortib, mojarolarning oldini olishgacha bo‘lgan bir nechta turli dasturlarni geografik toifalarga bo‘lingan yagona Global Yevropa jamg‘armasiga birlashtirishga qaratilgan bo‘ladi.
Yevropa Ittifoqining diplomatik bo‘limi xorijdagi 10 ta vakolatxonasi faoliyatini qisqartirishga, 100 ga yaqin mahalliy xodimni ishdan bo‘shatishga tayyorgarlik ko‘rayotgani xabar qilingandi.
Izoh (0)