Yevropa ittifoqi davlatlari yanvar oyi oxirida Suriyaga qarshi sanksiyalarni bekor qilishni muhokama qiladi. Bu haqda Yevroittifoq diplomatiyasi rahbari Kaya Kallas xabar berdi.
“Biz shu vaqtga kelib (sanksiyalarni bekor qilish to‘g‘risida) qaror qabul qilish imkoniyati haqiqatan ham paydo bo‘lishi uchun ishlayapmiz”, dedi Kallas.
Yevropa ittifoqi kengashining majlisi 27-yanvarga rejalashtirilgan. Shu bilan birga, Kallas o‘zining X (sobiq Twitter) sahifasida gap sanksiyalarni bekor qilish haqida emas, balki ularni yumshatish to‘g‘risida borishiga aniqlik kiritdi.
Reuters nashriga ko‘ra, Germaniya, Italiya va Fransiya sanksiyalarni bekor qilishni talab qilmoqda. Ammo yakuniy qaror faqat butun blok tomonidan qabul qilinishi mumkin. Vashington gumanitar yordam oqimini yengillashtirish uchun Bashar Asad hukmronligi tugaganidan so‘ng 6 oyga Suriyadagi hukumat idoralari bilan operatsiyalarni sanksiyalar ro‘yxatidan chiqargan.
6-yanvar kuni AQSH Suriya hukumat idoralari bilan ba’zi moliyaviy operatsiyalar, energiya resurslari bilan bog‘liq tranzaksiyalar, Suriya Markaziy banki orqali o‘tkazmalar vaqtincha sanksiyalardan chiqarilganini e’lon qildi.
Bu qaror bilan AQSH sanksiyalari ostidagi shaxslarning mol-mulki yoki mulkiy manfaatlarini blokdan chiqarilmaydi. Sanksiyalar ostidagi mamlakatlar bilan moliyaviy o‘tkazmalarni amalga oshirish imkoni bo‘lmaydi.
Hozirda Suriyaning deyarli butun aholisi qashshoqlik chegarasidan pastda yashaydi. Taxminan 75 foizi kuniga kishi boshiga 3,65 dollardan kam, 33 foizi esa 2,15 dollardan kam mablag‘ bilan kun kechirmoqda. 2011-yilda boshlangan fuqarolar urushigacha Suriya yirik neft eksportchisi bo‘lib, bundan yiliga 3-5 milliard dollar daromad olgan, asosiy xaridorlari Yevropa mamlakatlari edi.
Suriyaning yangi hukumati ko‘plab neft konlari ustidan nazoratni yo‘qotgan. Bu konlar asosan respublikaning shimoli-sharqida joylashgan bo‘lib, ularni hali ham Damashqning yangi hokimiyatiga bo‘ysunmaydigan kurd kuchlari nazoratida.
Asad rejimining qulashi 2024-yilning 8-dekabrida sodir bo‘ldi. Hokimiyat “Hayot Tahrir ash-Shom” qo‘liga o‘tdi. Asad Moskvada yaqin doiralari, jumladan, oilasi bilan birga siyosiy boshpana topdi.
Izoh (0)