Yevropa ittifoqi tashqi ishlar vazirlari Suriyadan sanksiyalarni olib tashlash bo‘yicha yo‘l xaritasini kelishib oldi. Bu haqda Yevropa diplomatiyasi rahbari Kaya Kallas ma’lum qildi.
Kallas Yevroittifoq sanksiyalarni olib tashlash masalasida “tezkor harakat qilishga intilayotganini” aytdi. Biroq Suriya rasmiylari “noto‘g‘ri qadamlar tashlasa”, qaror qayta ko‘rib chiqilishi mumkin. Kallas birinchi navbatda qanday sanksiyalar olib tashlanishiga aniqlik kiritmadi.
Manbalar, aviakompaniyalar, jumladan, Syrian Arab Airlines aviakompaniyasiga nisbatan cheklovlar va neft eksportiga taqiq qayta ko‘rib chiqilishini aytmoqda.
Yevropa ittifoqi Suriyaga qarshi sanksiyalarni 2012-yilda, Bashar Asad rejimi va isyonchi guruhlar o‘rtasidagi qarama-qarshilik keng ko‘lamli fuqarolar urushiga aylanganidan ko‘p o‘tmay joriy qila boshladi. Sanksiyalar, asosan, hukumat va harbiy tuzilmalarga qarshi joriy etilgan. Ular Suriyaning Yevropadagi aktivlarini muzlatishni, shuningdek, investitsiyalar va neft sotib olishni cheklashni o‘z ichiga oladi.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televidenie murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)