AQSH Rossiyaga qarshi sanksiyalarning ta’siridan hafsalasi pir bo‘ldi

Rossiyaga qarshi sanksiyalar kiritgan mamlakatlar kuchayib borayotgan iqtisodiy muammolarga duch kelmoqda, ammo bu cheklovlarning o‘zi Moskvaning xatti-harakatlariga ko‘p ta’sir qilmayapti, deb yozadi The New York Times.

Qilinayotgan sa’y-harakatlarga qaramasdan, neft narxlari rekord o‘rnatmoqda, rubl esa fevralda tushib ketganidan keyin iyunda dollarga nisbatan yetti yillik maksimumga yetdi. Shuningdek, AQSH neft embargosi va Rossiya neftining Yevroittifoqqa importi qisqarishi fonida AQSHda va Yevropada yonilg‘i narxlari keskin ko‘tarilib ketdi, shu bilan birga, ba’zi shtatlarda benzinning o‘rtacha narxi bir gallon uchun 5 dollardan oshadi, deya qayd etadi maqola mualliflari.

“Eng alam qiladigani shuki, sanksiyalar va ular bilan bog‘liq embargo Amerikaning bosh strategik raqobatchisi — Xitoyga past narxlarda katta hajmda neft sotib olish imkonini beradi, chunki Rossiya yo‘qotilgan daromadlarni qoplash uchun talabgorlarni qidirmoqda”, — deb yozadi NYT.

Gazeta Strategik va xalqaro tadqiqotlar markazi ilmiy xodimi, AQSH razvedkasining iqtisodiy masalalar bo‘yicha sobiq yuqori mansabli xodimi Jerard Dipipponing gaplarini keltirib o‘tdi, uning fikricha, yangi sanksiyalar ixtilofni maqbul yo‘l bilan tugatish uchun yetarli bo‘lmaydi. “Umuman olgan, fikrimcha, sanksiyalarning siyosiy chegarasiga yetib keldik”, — dedi u.

Maqola mualliflari qayd etishicha, AQSH tomonidan Eron, Suriya, Shimoliy Koreya, Venesuela va Kubaga nisbatan kiritilgan sanksiyalar ushbu hukumatlarning xatti-harakatlarini ahamiyatli darajada o‘zgartira olmadi — sanksiyalarning asosiy og‘irligi oddiy fuqarolar yelkasiga tushmoqda, rejim tarafdorlari esa foyda chiqarib olish usullarini topmoqda.

Avvalroq AQSH davlat kotibi Entoni Blinken G‘arb sanksiyalari allaqachon Rossiyaning iqtisodiy va moliyaviy tizimiga “dramatik” ta’sir o‘tkazganini va rossiyaliklar ularning kundalik hayotdagi ta’sirini his qilishini aytgandi. Uning ta’kidlashicha, sanksiyalar Rossiyani keng doiradagi tovarlar va texnologiyalardan mahrum qilgan, rublni beqarorlashtirgan bo‘lib, 2022-yilda uning iqtisodiyoti 10—15 foizga pasayishiga olib keladi. Blinken ogohlantirishicha, Ukrainada jangovar harakatlar to‘xtatilmagunicha, AQSH sheriklari bilan sanksiyalarni kuchaytirishda davom etadi.

Fevral oxiridan buyon AQSH, Yevroittifoq, Buyuk Britaniya va boshqa bir qator mamlakatlar Rossiyaga qarshi sanksiyalarning bir nechta paketini kiritdi. Cheklovlar siyosiy elita, biznesmenlar, ko‘mir va neft yetkazib berish, sanoat, bank sektori va iqtisodiyotning boshqa sohalariga tegishli bo‘ldi.

Rossiya hukumati bir tomonlama cheklov choralarining noqonuniyligini bir necha marta aytib o‘tgan, shuningdek, ular cheklovlarni kiritgan mamlakatlarning iqtisodiyotiga jiddiy salbiy ta’sir o‘tkazishini ta’kidlagan edi. Xususan, prezident Vladimir Putin Yevroittifoq Rossiyaga qarshi sanksiyalardan ko‘radigan ehtimoliy talafotni 400 milliard dollarga baholagan edi.