AQSh Moliya vazirligi KXDR bilan aloqalari sabab Rossiyadagi Yevropa YuSTO xususiy instituti va uning rektori Dmitriy Soinga nisbatan sanksiyalar qo‘llanganini e’lon qildi. Bu haqidagi xabar vazirlikning rasmiy saytiga joylashtirilgan.
“YuSTO Yevropa instituti va janob Soin Shimoliy Koreyadagi quruvchi-ishchilarga yuzlab talabalik vizalari berilishiga ko‘maklashgan”, deyiladi AQSh Moliya vazirligi bayonotida.
Qayd etilishicha, ishchilarning bir qismi KXDRdagi ommaviy qirg‘in qurolini ishlab chiqish dasturiga aloqador shaxslar bo‘lgan. Ularning daromadidan qurol dasturini amalga oshirishda foydalanilgan bo‘lishi mumkin, deyilgan xabarda.
Shuningdek, AQShning sanksiyalari ro‘yxatiga Xitoy, Myanma, Bangladesh va Shimoliy Koreyadan yana 14 nafar jismoniy shaxs va 9 ta tashkilot kiritilgan. Ular orasida Myanma hamda Bangladeshning harbiy tuzilmalari, Xitoy kompaniyalari va KXDR bosh prokuraturasi bor. Taqiqlar qo‘llanilgan shaxslar va tashkilotlarning barchasi inson huquqlari sohasida jiddiy kamchiliklarga yo‘l qo‘yganligi ta’kidlangan.
“YuSTO Yevropa instituti 1995-yilda universitet sifatida ro‘yxatdan o‘tgan va 2012-yilda institut sifatida qayta tashkil etilgan, deyilgan muassasa rasmiy saytidagi axborotda. Shuningdek, saytda OTM ta’sischilaridan biri Rossiya Davlat dumasi deputati, 2018-yildagi prezidentlik saylovlarida nomzod sifatida ishtirok etgan Sergey Baburin ekanligi yozilgan. Baburinning saylovoldi kampaniyasida Dmitriy Soin uning ishonchli vakili bo‘lgan. OTM saytida 1993–2007-yillarda Soinning Pridnestrovyada davlat xavfsizlik organlarida ishlagani ham bayon etilgan, shuningdek, u 2008-yilda “Yedinaya Rossiya” partiyasidan deputatlikka saylangan Valeriy Bogomolovning yordamchisi lavozimida faoliyat olib borgan.
“YuSTO Yevropa instituti”da talabalar menejment, yurisprudensiya va iqtisodiyot yo‘nalishlarida ta’lim oladi. Bundan tashqari oliygohda aromaterapiya hamda fitoterapiya kurslari o‘qitiladigan “faol uzoq yashash va adaptiv jismoniy tarbiya” kafedrasi, shuningdek “Inson ongiga ta’sir ko‘rsatish: himoya va hujum” hamda “Imij — vassalom!O‘zingni chetlatishlariga yo‘l qo‘yma!” va “astrologiyada (munajjimlik) menejment va marketing” kabi qo‘shimcha kurslar mavjud.
Institut talabalar va tinglovchilarga pandemiya sabab yuzaga kelgan iqtisodiy inqiroz sharoitida yaxshi narxlar taklif etgan. Oliy ta’limda tahsil olish narxi yiliga 80 ming rubl (qariyb 1100 AQSh dollari), qo‘shimcha ta’lim uchun narxlar esa 10 mingdan (136 dollar) 40 ming rublgacha (650 dollar) etib belgilangan.
Avval AQShning Eron, Suriya va Uganda fuqarolariga qarshi sanksiyalar joriy etgani, Vashingtonning Rossiyaga qarshi “tajovuzkor” sanksiyalar paketini tayyorlayotgani, AQSh va Yevropa Ittifoqi migratsiya inqirozi sabab Belarusga qarshi yangi sanksiyalar qo‘llagani haqida xabarlar berilgandi.
Izoh (0)